სერბეთში ვადამდელ საპარლამენტო არჩევნებზე ხმის მიცემის პროცესი მიმდინარეობს. Reuters-ი წერს, რომ ამ არჩევნების შედეგებზეა დამოკიდებული, დარჩება თუ არა ხელისუფლებაში კიდევ ოთხი წლით პრეზიდენტ ალექსანდრ ვუჩიჩის პარტია, მმართველი სერბული პროგრესული პარტია.

პარლამენტში 250 ადგილისთვის 18 პარტია და ალიანსი იბრძვის. საკანონმდებლო ორგანოში შესვლის ბარიერი ხმების 3%-ია.

საპარლამენტო არჩევნების პარალელურად დედაქალაქ ბელგრადსა და სერბეთის უმეტეს მუნიციპალიტეტებში ადგილობრივი არჩევნებიც მიმდინარეობს.

საარჩევნო უბნები ადგილობრივი დროით 20:00 საათზე დაიხურება. სახელმწიფო საარჩევნო კომისია სრულ შედეგებს სავარაუდოდ უახლოეს დღეებში გამოაცხადებს.