საქართველოს პარლამენტის ევროპასთან ინტეგრაციის კომიტეტის წევრებისა და აპარატის თანამშრომლების მონაწილეობით, 2023 წელს განხორციელებული საქმიანობის შეჯამებისა და 2024 წლის სამოქმედო გეგმის შემუშავების მიზნით სამუშაო შეხვედრა გაიმართა. ამის შესახებ ინფორმაციას პარლამენტის პრესსამსახური ავრცელებს.

პარლამენტის ინფორმაციით, შეხვედრის ფარგლებში მონაწილეებმა შეაჯამეს 2023 წელს კომიტეტის მიერ გაწეული საქმიანობა, განხილული კანონპროექტები, საზედამხედველო საქმიანობისა და საპარლამენტო დიპლომატიის ფარგლებში განხორციელებული ღონისძიებები.

„კომიტეტის წევრებმა შეიმუშავეს 2024 წლის სამოქმედო გეგმის პროექტი, იმსჯელეს სამომავლო საკანონმდებლო ინიციატივებზე და საზედამხედველო მექანიზმებზე. განსაზღვრეს საკითხები, რომლის საფუძველზეც კომიტეტი საქართველოს ევროკავშირში ინტეგრაციის პროცესის მიმდინარეობას გაუწევს ზედამხედველობას.

შეხვედრისას განიხილეს საერთაშორისო თანამშრომლობისა და ევროკავშირში ინტეგრაციის თაობაზე საზოგადოებასთან ურთიერთობის მიმართულებით კომიტეტის მიერ შემდეგი წლის განმავლობაში განსახორციელებელი ღონისძიებები.

ევროპასთან ინტეგრაციის კომიტეტი ახალ სამოქმედო გეგმას 2024 წლის დასაწყისში დაამტკიცებს.

სამუშაო შეხვედრა ევროკავშირის პროექტის - „ასოცირების შესახებ შეთანხმების განხორციელების მხარდაჭერა" ხელშეწყობით გაიმართა“, - ნათქვამია ინფორმაციაში.