უკრაინის შეიარაღებულ საჰაერო ძალებში აცხადებენ, რომ სამი „სუ-34“ გამანადგურებლის დაკარგვის შემდეგ რუსებმა უკრაინის ტერიტორიაზე საჰაერო თავდასხმების რაოდენობა შეამცირეს.

„ახლა მტერი ცდილობს შეძლებისდაგვარად დაზვერვას, ინფორმაციის შეგროვებას სამხრეთის იმ რაიონებში, სადაც, რუსული მოიერიშეები ჩამოაგდეს. გასაგებია, რომ ისინი ეძებენ საშუალებებს, რომლებმაც ეს თვითმფრინავები, როგორც იტყვიან, „მარადიულ ფრენაზე“, გაგზავნეს. მტერი მნიშვნელოვნად ნაკლებ საჰაერო იარაღს, განსაკუთრებით მართვად ბომბებს, იყენებს“, - განაცხადა უკრაინის საჰაერო ძალების ხელმძღვანელმა, იური იგნატმა.

მისი თქმით, რუსული თვითმფრინავების ჩამოგდებასთან დაკავშირებული ინციდენტები, შეიძლება, განმეორდეს.

„შეგვიძლია განვახორციელოთ ასეთი ოპერაციები სხვადასხვა მიმართულებით, საკითხი იმაში მდგომარეობს, რომ მეტი ასეთი სისტემა გვქონდეს, ველოდებით უკვე გამოცხადებულ დახმარებას, კერძოდ, დამატებით Patrion, Iris-T და ა.შ. სისტემებს“, - აღნიშნა იგნატმა.

შეგახსენებთ, 22 დეკემბერს ცნობილი გახდა, რომ უკრაინელებმა სამხრეთის მიმართულებით სამი რუსული „სუ-34“ მოიერიშე თვითმფრინავი გაანადგურეს.