ჯო ბაიდენმა კატარის ამირასთან „ჰამასის“ მძევლების გათავისუფლების საკითხი განიხილა
აშშ-ის პრეზიდენტმა ჯო ბაიდენმა კატარის ამირა შეიხ თამიმ ბინ ჰამად ალ-თანისთან სატელეფონო საუბრისას „ჰამასის“ მძევლების გათავისუფლების საკითხი განიხილა, - ამის შესახებ ინფორმაციას თეთრი სახლი ავრცელებს. მათივე ცნობით, აშშ-ის პრეზიდენტმა კატარის ამირასთან ღაზაში ჰუმანიტარული დახმარების გაზრდის მცდელობების შესახებაც ისაუბრა.
„ორმა ლიდერმა „ჰამასის“ მიერ დაკავებული მძევლების, მათ შორის ამერიკის მოქალაქეების, გათავისუფლების უზრუნველსაყოფად აუცილებელი და გადაუდებელი ძალისხმევა განიხილა“, - ნათქვამია თეთრი სახლის განცხადებაში.
შეგახსენებთ, ნოემბერში „ჰამასსა“ და ისრაელს შორის ჰუმანიტარული პაუზის შეთანხმების მიღწევისას შუამავლის როლი კატარმა და ეგვიპტემ შეასრულა.
