კიევში, კიევის ოლქში, ზაპოროჟიეში, ხმელნიცკსა და დნიპროში საჰაერო განგაშის დროს აფეთქებები მოხდა. აფეთქებები ასევე ისმოდა ოდესაში, ხარკოვსა და ლვოვშიც, - ინფორმაციას უკრაინული მედია ავრცელებს.

გავრცელებული ინფორმაციით, დნიპროში, ერთ-ერთ სავაჭრო ცენტრში ხანძარი გაჩნდა. ქალაქის მერის განცხადებით, არიან დაღუპულები და დაშავებულები.

ამასთან, კიევის მერის ვიტალი კლიჩკოს ცნობით, დედაქალაქის შევჩენკოს რაიონში საწყობის ნანგრევების ქვეშ სამი ადამიანია მოყოლილი.

ხარკოვის მერმა იგორ ტერეხოვმა გაავრცელა ინფორმაცია, რომ რუსული ძალების მიერ განხორციელებული თავდასხმის შედეგად დაიღუპა ერთი და დაშავდა 8 ადამიანი.

ლვოვის მერმა, ანდრეი სადოვიმ განაცხადა, რომ ქალაქში აფეთქებები მოხდა. მისი ინფორმაციით, რუსებმა ლვოვში საცხოვრებელ სახლს დაარტყეს. ამასთან, სავარაუდოდ, რაკეტის ნამსხვრევების ჩამოვარდნის გამო, ლიცეუმის შენობაში ხანძარი გაჩნდა, არიან დაშავებულები.

შეგახსენებთ, უკრაინის რამდენიმე ოლქში, წუხანდელი ღამის შემდეგ საჰაერო განგაში ორჯერ გამოცხადდა. გავრცელებული ინფორმაციით, რუსულმა ძალებმა ქვეყნის ტერიტორიას დრონებითა და რაკეტებით შეუტიეს.