ლიეტუვუს საგარეო საქმეთა მინისტრი, გაბრიელიუს ლანდსბერგისი აცხადებს, რომ დასავლეთი რუსეთის აგრესიის წინააღმდეგ უკრაინის მხარდაჭერის კუთხით ისტორიული შეცდომების გამეორების ზღვარზეა.
„25 წელია ვცდილობთ პუტინის იმპერიალიზმის შეკავებას დიალოგითა და დიპლომატიური გზით, ხოლო ის აგრძელებს საზღვრების იგნორირებას და ქალაქების მიწასთან გასწორებას“, - აღნიშნა გაბრიელიუს ლანდსბერგისმა.
მისი თქმით, 2014 წელს უკრაინის წინააღმდეგ რუსეთის ჰიბრიდული აგრესიის შემდეგ, მინსკის შეთანხმებებმა პაუზა გამოიწვია, მაგრამ სინამდვილეში მხოლოდ ომი გადადო მომავლისთვის.
ამასთან, ლიეტუვის საგარეო უწყების ხელმძღვანელის ცნობით, ომის შემდეგი ეტაპი შეიძლება მიმართული იყოს არა მხოლოდ უკრაინის, საქართველოს ან მოლდოვას წინააღმდეგ, არამედ ნატო-ს ერთ-ერთი ქვეყნის წინააღმდეგაც და ასეთი აგრესიის მოგერიების ფასი კიდევ უფრო დიდი იქნება.
„რუსეთის იმპერიალისტური რევანშისტული ამბიციები არ შეიცვლება. შემდეგი ეტაპი მიმართული იქნება არა მხოლოდ უკრაინის, საქართველოს ან მოლდოვას წინააღმდეგ, არამედ, შესაძლოა, ნატო-ს წინააღმდეგაც. ადამიანური და ეკონომიკური ფასი მხოლოდ გაიზრდება. ჩვენ ისტორიული შეცდომების გამეორების ზღვარზე ვართ. დარწმუნებული ვარ, რომ თუ ჩვენ ახლა არ დავამარცხებთ რუსეთს, ეს ნიშნავს, რომ ჩვენი არჩეული გზა იქნება წარმოუდგენელი და არასაჭირო დანაკარგების გადატანა სანამ საბოლოოდ არ გადავწყვეტთ, რომ დროა ვიმოქმედოთ და გავიმარჯვოთ“, - აღნიშნა გაბრიელიუს ლანდსბერგისმა.
