რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე საშობაო ლიტურგიას დაესწრო

საქართველოს მართლმადიდებელი ეკლესია და მრევლი უმნიშვნელოვანეს ქრისტიანულ დღესასწაულს, ქრისტესშობას ზეიმობს. ამის შესახებ ინფორმაციას რელიგიის საკითხთა სახელმწიფო სააგენტო ავრცელებს.

მათივე ცნობით, საქართველოს ყველა ტაძარში სადღესასწაულო მსახურება იმართება. საშობაო ლიტურგიასთან ერთად, პატრიარქის კურთხევის თანახმად, ფანჯრებში საშობაო სანთლები ციმციმებს.

„დღევანდელ კონფლიქტებსა და ომებს თან სდევს რეალური საშიშროება იმისა, რომ ნებისმიერი მათგანი მსოფლიო კატასტროფად იქცეს და მთელი კაცობრიობა გაანადგუროს. ამიტომაც ყველას, ჩვენი შესაძლებლობებისამებრ, გვმართებს ზრუნვა მშვიდობისთვის“, - ნათქვამია საქართველოს კათოლიკოს-პატრიარქის, უწმინდესისა და უნეტარესის ილია მეორის საშობაო ეპისტოლეში, რომელიც წმინდა სამების საკათედრო ტაძარში შეკრებილ მრევლს, საზეიმო წირვის დაწყებამდე, საქართველოს მართლმადიდებელი ეკლესიის არქიდიაკონმა, დემეტრემ (დავითაშვილი) გააცნო.

საშობაო ლიტურგია საქართველოს სამოციქულო მართლმადიდებელი ეკლესიის საპატრიარქო ტახტის მოსაყდრემ. სენაკისა და ჩხოროწყუს ეპარქიის მიტროპოლიტმა შიომ (მუჯირი) აღავლინა. საშობაო წირვაზე იმყოფებოდნენ საქართველოს პრემიერ-მინისტრი ირაკლი ღარიბაშვილი, საქართველოს პარლამენტის თავმჯდომარე შალვა პაპუაშვილი, პარტია „ქართული ოცნება-დემოკრატიული საქართველოს" თავმჯდომარე, საქართველოს პარლამენტის წევრი ირაკლი კობახიძე, რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე, აღმასრულებელი და საკანონმდებლო ხელისუფლების წარმომადგენლები.

„რელიგიის საკითხთა სახელმწიფო სააგენტო ქრისტესშობას ულოცავს საქართველოს სამოციქულო ავტოკეფალურ მართლმადიდებელ წმინდა ეკლესიას, ყველა მართლმადიდებელს და მშვიდობას, სიკეთეს, სიხარულს გისურვებთ თქვენ, თქვენს ოჯახებსა და სრულიად საქართველოს“, - აღნიშნულია ინფორმაციაში.