ტექნოლოგიების მუდმივად განვითარებად ეკოსისტემაში ინოვაცია პროგრესის მთავარი მამოძრავებელი ძალაა. ამ გარემოში ბიზნესისა და ტექნოლოგიების უნივერსიტეტის ორგანიზებით, იგეგმება AI Hackathon - ხელოვნური ინტელექტის ჰაკათონი, რომელში მონაწილეობაც ქვეყნის მასშტაბით ნებისმიერი უნივერსიტეტის სტუდენტს შეუძლია. ეს არ არის მხოლოდ ჰაკათონი, ეს განსაკუთრებული შესაძლებლობაა სტუდენტებისთვის, რომ გამოავლინონ საკუთარი ცოდნა, კრეატიულობა, პრობლემების გადაჭრის უნარი და წინ გადადგან ნაბიჯი ინვესტიციების მოსაზიდად.

საპრიზო ფონდი - 20 000 ლარი

AI ჰაკათონში მონაწილეები არა მხოლოდ საკუთარ შესაძლებლობებს გამოავლენენ, არამედ დიდი საპრიზო ფონდის მოგების შანსსაც მიიღებენ. უნივერსიტეტის მიერ გენერირებული 20 000 ლარიანი საპრიზო ფონდი მნიშვნელოვანი ფინანსური მხარდაჭერაა ახალგაზრდებისთვის.

მონაწილეებს შესაძლებლობა ეძლევათ, საკუთარი იდეები რეალობად აქციონ. საპრიზო ფონდი გამარჯვებული იდეების პროტოტიპების შექმნას მოხმარდება.

მონაწილეობის შესაძლებლობა საქართველოს ნებისმიერი უნივერსიტეტის სტუდენტს

AI ჰაკათონის ერთ-ერთი ყველაზე გამორჩეული ასპექტი მისი მასშტაბურობაა. მონაწილეობის მიღება შეუძლია ნებისმიერ სტუდენტს საქართველოდან, განურჩევლად უნივერსიტეტისა თუ რეგიონისა. ჰაკათონი უზრუნველყოფს თანაბარ პირობებს სტუდენტებისთვის. მასში მონაწილეობა სტუდენტებს გუნდურად შეუძლიათ. გუნდში მონაწილეების რაოდენობა კი 2-4 უნდა იყოს.

ღონისძიების მასშტაბურობა ბიზნესისა და ტექნოლოგიების უნივერსიტეტის მიზანმიმართული ქმედებაა ქვეყანაში ხელოვნური ინტელექტის გამოყენების გაზრდისა და წახალისებისთვის.

ანგელოზ ინვესტორებთან წარდგენის შესაძლებლობა

საპრიზო ფონდის პარალელურად, უნივერსიტეტი ჰაკათონის გამარჯვებულებს სთავაზობს შესანიშნავ შესაძლებლობას, წარდგნენ ანგელოზი ინვესტორების წინაშე. გამარჯვებული გუნდები მაისში გლობალური სტარტაპ ფონდის ყოველწლიურ ღონისძიებაზე წარადგენენ საბოლოო პროდუქტს და შეხვდებიან ანგელოზ ინვესტორებს ამერიკიდან, ისრაელიდან და ევროპიდან, სადაც გამარჯვებული იდეის საბოლოო პროტოტიპს წარადგენენ.

ცოდნისა და კავშირების შეძენის განსაკუთრებული შესაძლებლობა

AI Hackathon-ში მონაწილეობა სტუდენტებისთვის არის შანსი, გაიუმჯობესონ თავიანთი უნარები. თავად ღონისძიების ფორმატი ხელს უწყობს სწრაფი აზროვნების, პრობლემის გადაჭრისა და ეფექტური გუნდური მუშაობის უნარების განვითარებას. მონაწილეები მიიღებენ პრაქტიკულ გამოცდილებას AI გადაწყვეტილებების შემუშავებაში, რაც დღეს ძალიან მოთხოვნადია ტექნიკურ ინდუსტრიაში.

გარდა ამისა, მონაწილეები დაუკავშირდებიან თანამოაზრეებს, სექტორის პროფესიონალებსა და პოტენციურ მენტორებს. ეს კავშირები შეიძლება იყოს გარდამტეხი მათი მომავალი კარიერული გზების ჩამოყალიბებასა და დასაქმების შესაძლებლობების გაჩენაში.

ბიზნესისა და ტექნოლოგიების უნივერსიტეტის მიერ ინიცირებული AI ჰაკათონი არის სტრატეგიული ინვესტიცია ტექნოლოგიებისა და ინოვაციების სექტორში. ღონისძიება სთავაზობს მნიშვნელოვან გამოცდილებას მათ, ვისაც სურს ხელოვნური ინტელექტის სამყაროში თავი დაიმკვიდროს.

რეგისტრაცია დაიწყო და გაგრძელდება 18 იანვრამდე.

(R)