„ნაციონალური მოძრაობის“ პოლიტსაბჭოს წევრის, ლაშა ფარულავას განცხადებით, ექსპრემიერი ბიძინა ივანიშვილი არის ქვეყანაში მთავარი ოლიგარქი და პოლიტიკაში მისი დაბრუნება უკვე არის რუსული მმართველობის გაფორმება.

როგორც მან ჟურნალისტებს განუცხადა, ერთადერთი გზა არჩევნებში რუსული ოლიგარქიული მმართველობის დამარცხებაა.

„ეს არის რუსული მმართველობის გაფორმება. ავტორიტარული რეჟიმიდან გადავდივართ რუსულ ოლიგარქიულ მმართველობაზე, სადაც მთავარი მოქმედი პერსონაჟი იქნება ბიძინა ივანიშვილი. ის იქნება ყველაფრის განმსაზღვრელი. ყველა კონსტიტუციური წესრიგი, რაც სახელმწიფოს აქვს, ფაქტობრივად მოშლილია. ბიძინა ივანიშვილი არის ქვეყანაში მთავარი პერსონა და მთავარი ოლიგარქი. ამიტომ, ერთადერთი გზა არის არჩევნებში რუსული ოლიგარქიული მმართველობის დამარცხება, რითაც დაიწყება ქვეყანაში ევროპეიზაციის პროცესის გაგრძელება, რაც მიიყვანს საქართველოს ევროკავშირის წევრობამდე“, - განაცხადა ლაშა ფარულავამ.

კითხვაზე, რამდენად არის მოსალოდნელი პრემიერ-მინისტრ ირაკლი ღარიბაშვილის გადაყენება, ლაშა ფარულავამ უპასუხა, რომ ცვლილებები იქნება, მაგრამ მხოლოდ კოსმეტიკური.

„ბიძინა ივანიშვილი პოლიტიკიდან არასდროს წასულა. მისი საჯარო პოლიტიკაში შემოსვლა ახლა ნიშნავს იმას, რომ მათ შორის იქნება კოსმეტიკური ცვლილებები. ბიძინა ივანიშვილმა ფაქტობრივად, კიდევ ერთხელ თქვა, რომ ირაკლი ღარიბაშვილი არის კორუმპირებული. როგორც ერთხელ თქვა, რომ კორუმპირებულია და შემდეგ მოაბრუნა, არ არის გამორიცხული, ეს მასკარადი თავიდან გაათამაშოს. ბიძინა ივანიშვილი რითაც გამოირჩევა არის ის, რომ ის ახალ ტრიუკებს იგონებს და ცდილობს, ამით საზოგადოება კიდევ ერთხელ მოატყუოს, მაგრამ ქართული საზოგადოება ამას აღარ „შეჭამს“, ვინაიდან ყველაფერი ნახა, რისი ნახვაც შეიძლებოდა“, - განაცხადა ფარულავამ.