შეიძლება „ქართული ოცნება“ გაიყოს და შეიძლება ეს გაყოფა იყოს ივანიშვილის ერთ-ერთი ამოცანა, - ამის შესახებ პოლიტოლოგმა რამაზ საყვარელიძემ „პალიტრანიუსის“ გადაცემა „პოლიტიკურ სივრცეში“ განაცხადა.

რამაზ საყვარელიძის მოსაზრებით, არსებული ოპოზიციისგან ალტერნატივა ვერ შეიქმნება და შეიძლება სწორედ ამიტომ „ქართული ოცნება“ „გაორდეს“.

„მოსალოდნელია ამ დიდი პარტიის დაშლა. არა იმიტომ, რომ თვითონ შიგნით აქვთ კონფლიქტები, არამედ იმისთვის, რომ საქართველოში პოლიტიკური სპექტრი შეიქმნას, რადგან არსებულმა ოპოზიციამ პოლიტიკური სპექტრის ფუნქცია, ანუ ხელისუფლების ალტერნატივის ფუნქცია ვერ შეასრულა.

არსებული ოპოზიციისგან ვერ შეიქმნება ალტერნატივა. „ქართული ოცნება“ გაორდება. სახელისუფლებო პარტიები არ გაორდა შევარდნაძის დროს და ზვიადის დროს? გვქონდა მაშინ ვერსია, რომ ჟვანია და სააკაშვილი დამოუკიდებელი ძალა გახდებოდნენ? ისეთი მდიდარი ისტორია გავიარეთ 30 წელიწადში, რომ კიდე არ უნდა გვიკვირდეს, არიქა, პარტია როგორ შეიძლება გაიყოსო, როცა ყველა პოლიტიკური პროგრესი საქართველოში გაყოფის ხარჯზე მოხდა“, - განაცხადა რამაზ საყვარელიძემ.

რაც შეეხება ბიძინა ივანიშვილის პოლიტიკაში დაბრუნების მიზეზს, რამაზ საყვარელიძის განცხადებით, შესაძლოა „ქართული ოცნების“ გუნდის შიგნით მას აღარ ემორჩილებოდნენ.

„გამოჩნდება გუნდის შიგნით ვინ არ ემორჩილებოდა. არც მაშინ ჩანდა, რომ კვირიკაშვილი არ ემორჩილებოდა. ხომ ფაქტია, რომ მაშინ თქვა, „ჩემს ტელეფონს აღარ იღებსო [კვირიკაშვილი]“. გამოჩნდება ახლა ვინ არ იღებდა. ის, რომ მისი მართვის გავლენიდან შეიძლება ნელ-ნელა გასულიყვნენ ადამიანები, ეს ბუნებრივია. მშობლის გავლენიდანაც გადის შვილი, გარდამავალი ასაკი ჰქვია ამას. მშობელი ამბობს ხოლმე „მე გაგაჩინე და გაგზარდეო“ და ამანაც მე გაგაჩინეთ და გაგზარდეთო“, - განაცხადა რამაზ საყვარელიძემ.