მე ვფიქრობ, რომ უფრო გასაკვირი ის არის, რა რეაქციებიც აქვთ ოპოზიციონერებს, ვიდრე ის, რომ საპარლამენტო დელეგაცია დღეს ჩინეთში კოლეგებთან შეხვედრებს მართავს,- ამის შესახებ საქართველოს ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ „ქართული ოცნების“ დელეგაციის ჩინეთში ვიზიტთან დაკავშირებით დასმული კითხვის საპასუხოდ განაცხადა.

დავითაშვილის განმარტებით, როდესაც მაღალ დონეზე თანამშრომლობაზეა საუბარი, სამთავრობო უწყებებს სჭირდება მნიშვნელოვანი პოლიტიკური მხარდაჭერა საპარლამენტო გუნდის მხრიდანაც.

„პირველ რიგში, გეტყვით, რომ როდესაც ჩვენ 2023 წელს გვქონდა ძალიან მნიშვნელოვანი დინამიკა ჩინეთის სახალხო რესპუბლიკასთან თანამშრომლობის გააქტიურების კუთხით, აქ ლოგიკურია, რომ მთავრობის აქტივობასთან ერთად, საკანონმდებლო დონეზე თანამშრომლობა და აქტივობა იქნებოდა. მე ვფიქრობ, რომ უფრო გასაკვირი ის არის, რა რეაქციებიც აქვთ ოპოზიციონერებს, ვიდრე ის, რომ საპარლამენტო დელეგაცია დღეს ჩინეთში კოლეგებთან ახორციელებს შეხვედრებს. ჩვენ გვესმის, რომ როდესაც მაღალ დონეზე თანამშრომლობაზეა საუბარი, სამთავრობო უწყებებს სჭირდება მნიშვნელოვანი პოლიტიკური მხარდაჭერა საპარლამენტო გუნდის მხრიდანაც, იმიტომ, რომ პოლიტიკური გადაწყვეტილებების გარეშე, საკანონმდებლო მხარდაჭერის გარეშე, ბევრი ინიციატივა თუ სურვილი ვერ განხორციელდება, ამიტომ ვფიქრობ, რომ პროდუქტიული იქნება ის ვიზიტი, რომელსაც დღეს საქართველოს საპარლამენტო დელეგაცია ახორციელებს ჩინეთში“,- განაცხადა დავითაშვილმა.