ევროკომისიის ცხრა რეკომენდაციის შესრულების პროცესში ინკლუზიურობის კომპონენტი აუცილებლად გათვალისწინებული იქნება - დაცული იქნება ღია კარის პრინციპი, - აღნიშნული განცხადება პარლამენტში უმრავლესობის დეპუტატმა გივი მიქანაძემ გააკეთა.

მიქანაძის ინფორმაციით, საკითხების პარლამენტის კომიტეტებსა და სესიაზე გატანამდე გარკვეული წინამოსამზადებელი პროცესი გაიმართება.

რაც შეეხება იმას, თუ როგორი იქნება წინამოსამზადებელი ფორმატები, მიქანაძის თქმით, ადგილი ექნება გარკვეულ აქტივობებს, კონსულტაციებს, რაც პოზიციების გაცვლას გახდის შესაძლებელს.

"რა თქმა უნდა, ჩვენ ორიენტირებული ვართ, რომ ევროკომისიის ცხრა რეკომენდაცია მაქსიმალურად მოკლე პერიოდში შესრულდეს. რეკომენდაციების შესრულებაზე სრული მზაობა გვაქვს. ინკლუზიურობის კომპონენტი აუცილებლად გათვალისწინებული იქნება. მთავარია, ამ ინკლუზიურობას ოპოზიცია კვლავაც დესტრუქციისთვის გამოიყენებს თუ რაიმე კონსტრუქციულობის ელემენტს შემოიტანენ - ვეჭვობ, რომ მათ ამის პოტენციალი არა აქვთ და ისევ ძველ დღის წესრიგს დაადგებიან.

რა თქმა უნდა, პარლამენტის საგაზაფხულო სესიაზე აქტიური განხილვა დაიწყება, თუმცა ვფიქრობთ, რომ ვიდრე საკითხები კომიტეტებსა და სესიაზე გადაინაცვლებს, წარიმართოს გარკვეული წინამოსამზადებელი პროცესი. ამ ეტაპზე გამიჭირდება თქმა, თუ რა ფორმით იქნება ინკლუზიურობა, მაგრამ ეს ყველა დონეზე იქნება უზრუნველყოფილი იქნება.

ვნახოთ, რა ფორმითა და კონსტრუქციულობით ჩაერთვება ოპოზიცია და სამოქალაქო სექტორი", - განაცხადა გივი მიქანაძემ.