გერმანიის ქალაქ კიოლნში მემარჯვენე ექსტრემიზმის წინააღმდეგ საპროტესტო აქცია გაიმართა. ამის შესახებ ინფორმაციას Spiegel-ი ავრცელებს.

ადგილობრივი პოლიციის შეფასებით, საპროტესტო აქციაზე ათიათასობით ადამიანი იმყოფებოდა და რამდენიმე საათით მოძრაობა შეიზღუდა. გასულ შაბათ-კვირას მსგავსი აქციები გერმანიის სხვა ქალაქებშიც გაიმართა და პოტსდამში გამართულ აქციაზე გერმანიის კანცლერი, ოლაფ შოლცი და საგარეო საქმეთა მინისტრი, ანალენა ბერბოკიც გამოჩნდნენ.

აქციების გამართვის მიზეზს, საგამოძიებო სტატიის გამოქვეყნება წარმოადგენდა, რომლის მიხედვით, გერმანული ულტრამემარჯვენე პარტიის, „ალტერნატივა გერმანიისთვის“ პოლიტიკოსებმა და სხვა ულტრამემარჯვენე ორგანიზაციების წევრებმა შეხვედრა გამართეს, სადაც ქვეყნიდან იმიგრანტული წარმოშობის ადამიანების მასობრივი დეპორტაციის იდეაზე იმსჯელეს.