სახელმწიფო დეპარტამენტის წარმომადგენლის ვიზიტი მნიშვნელოვანია ჩვენი ქვეყნისთვის და ჩვენი მოქალაქეებისთვის. 2024 წელს დასრულდება ივანიშვილის ხელისუფლების მმართველობა, რომელიც მხოლოდ და მხოლოდ კორუფციული გარიგებებით არის დაკავებული, - ამის შესახებ „ერთიანი ნაციონალური მოძრაობის“ რეგიონულმა მდივანმა, გიორგი ბოტკოველმა სახელმწიფო დეპარტამენტის ანტიკორუფციული მიმართულების წარმომადგენლის ჩამოსვლასთან დაკავშირებით განაცხადა.

მისივე თქმით, ასეთი ადამიანების ჩამოსვლა და შესაბამისად, ამ ტიპის ყურადღება საქართველოს არ მოაკლდება.

„რას ნიშნავს სახელმწიფო დეპარტამენტის ანტიკორუფციული მიმართულების წარმომადგენლის ჩამოსვლა დღეს საქართველოში? დარწმუნებული ვარ, ეს უფრო კარგად იმ ხელისუფლების წარმომადგენლებმა იციან, რომელი ხელისუფლებაც გვყავს ჩვენ ბიძინა ივანიშვილის ოლიგარქიული რეჟიმის ხელდასმით და ისინი ფაქტობრივად წარმოადგენენ ერთ კორუფციულ კლანს. სწორედ ასეთი ადამიანების ჩამოსვლა და ასეთი ყურადღება არ მოაკლდება ჩვენს ქვეყანას და 2024 წელს დასრულდება იმ ხელისუფლების მმართველობა, რომელიც მხოლოდ და მხოლოდ კორუფციული საკითხებით, საკუთარი ჯიბეების გამდიდრებით არის დაკავებული და ის ვალდებულებები, რომელიც 2012 წელს აიღო მთავარმა კორუფციული ბუდის ავტორმა ივანიშვილმა და არ შეასრულა, 2024 წელს ქართველი ხალხი გასცემს ამ ყველაფერს პასუხს,“ განაცხადა გიორგი ბოტკოველმა.