ბელგიის პრემიერი აცხადებს, რომ 280 მილიარდი ევროს ოდენობის რუსეთის გაყინული აქტივების კონფისკაციისთვის მკაფიო მექანიზმია საჭირო
280 მილიარდი ევროს ოდენობის რუსეთის ცენტრალური ბანკის გაყინული აქტივების კონფისკაციისთვის მკაფიო მექანიზმია საჭირო. ამის შესახებ ბელგიის პრემიერ-მინისტრმა, ალექსანდრ დე კრომ განაცხადა.
„ჩვენ აქტივების კონფისკაციაზე უარს არ ვამბობთ, მაგრამ მექანიზმზე უნდა ვიმუშაოთ. მაგალითად, მათი გამოყენება უკრაინის დახმარებისთვის საჭირო თანხების მოსაზიდად შეიძლება“, - განაცხადა ალექსანდრ დე კრომ.
„ჩვენ შემდგომი დისკუსიისთვის და გლობალური ფინანსური სისტემის დესტაბილიზაციის გარეშე, უკრაინისთვის ამ ტრანსფერების სამართლებრივი საფუძვლის მოძიებისთვის მზად ვართ“, - აღნიშნა ბელგიის პრემიერ-მინისტრმა.
შეგახსენებთ, რომ „დიდი შვიდეულის“ ქვეყნები რუსული გაყინული აქტივების კონფისკაციას განიხილავენ, მაგრამ ზოგიერთი წევრი სახელმწიფო ცენტრალური ბანკის აქტივების მიმართ ასეთი ნაბიჯის გადადგმისგან თავს იკავებს.
