ირანის სამხრეთ-აღმოსავლეთ სასაზღვრო რეგიონში პაკისტანის მიერ განხორციელებული სარაკეტო იერიშის შედეგად დაღუპულთა რიცხვი ცხრამდე გაიზარდა, - ამის შესახებ ინფორმაციას ირანის სახელმწიფო მედია ავრცელებს.

„დღეს დილით განხორციელებული სარაკეტო თავდასხმის შედეგად, სარავანის ერთ-ერთ სასაზღვრო სოფელში კიდევ ორი მამაკაცი დაიღუპა. დაღუპულთა რიცხვი ცხრამდე გაიზარდა“, - განაცხადა სისტანი-ბელუჯისტანის ოსტანის გუბერნატორის მოადგილემ, ალირეზა მარჰამატიმ.

პაკისტანის მიერ სისტანი-ბელუჯისტანში განხორციელებული შეტევების შემდეგ ირანის საგარეო საქმეთა სამინისტროში პაკისტანელი დიპლომატი ახსნა-განმარტებისთვის დაიბარეს.

შეგახსენებთ, სამშაბათს, ირანმა პაკისტანის ტერიტორიაზე სარაკეტო შეტევა განახორციელა, რასაც დღეს დილით, პაკისტანის მიერ საპასუხო იერიშები მოჰყვა.