ქუთაისში თეთრი ხიდი ისევ დაზიანებულია და მოქალაქეებისთვის საფრთხეს წარმოადგენს, - ამის შესახებ ინფორმაციას ქუთაისის საკრებულოს წევრი ავრცელებს.

„ნაციონალური მოძრაობის“ დეპუტატის, გიგა შუშანიას განცხადებით, თეთრი ხიდის რეაბილიტაციისთვის ადგილობრივი ბიუჯეტიდან, 2018 წელს 500 ათას ლარამდე დაიხარჯა, თუმცა სამუშაოები უხარისხოდ შესრულდა, ხიდი რამდენჯერმე დაზიანდა და მინის ფილები გაბზარულია.

გიგა შუშანია ხიდის ხელახალ რეაბილიტაციასა და იმ ადამიანების დასჯას მოითხოვს, რომლებმაც უხარისხო სამუშაოები ჩაატარეს.

საკრებულოს ოპოზიციონერი წევრი სხვა ისტორიული ძეგლების საფრთხეებზეც ამახვილებს ყურადღებას და ამბობს, რომ რეაბილიტაციის შედეგად არა მხოლოდ თეთრი ხიდი დაზიანდა, არამედ ავთენტურობას კარგავს იმერეთის მეფეთა სასახლე „ოქროს ჩარდახი“, ასევე გაურკვეველია, შეინარჩუნებს თუ არა ისტორიულ სახეს ცენტრალური ბულვარი, რადგანაც სამუშაოები დაწყებულია, თუმცა პროექტის პრეზენტაცია ჯერ არ მომხდა.

შუშანიას თქმით, აუცილებელია, პროცესში კომპეტენტური ადამიანები ჩაერთონ.

„ამ ხიდი რეაბილიტაციაზე „ქართულმა ოცნებამ“ წლების წინ დახარჯა ნახევარი მილიონი ლარი და კულტურული მემკვიდრეობის ძეგლი დააზიანა. გაკეთების ნაცვლად, დაუკარგა ავთენტური სახე. კონსტრუქცია მთლიანად დაჟანგული და დაზიანებულია. ზედაპირი უსაფრთხო აღარაა მოქალაქეებისთვის, წვიმიან ამინდშიც კი საშიშია გავლა. მინის ფილები ზიანდება, ამიტომ მოვითხოვთ, რომ მოხდეს ხელახალი რეაბილიტაცია. მოხდეს პროექტის საჯარო განხილვა, რომ დაუბრუნდეს ავთენტური სახე. ამასთან დაისაჯონ ის პირები, ვინც არასწორად შეასრულეს რეაბილიტაცია. მხოლოდ თეთრი ხიდი არაა, საფრთხის წინაშეა „ოქროს ჩარდახი“ და ცენტრალური ბულვარი“, - განაცხადა გიგა შუშანიამ.