თბილისის მერის მოადგილის, ირაკლი ბენდელიანის განცხადებით, წერეთლის გამზირზე მიმდინარე სარეაბილიტაციო სამუშაოების იანვრის ბოლოსთვის დასრულების შესახებ მოსახლეობისთვის მიცემული პირობა შესრულდება.

როგორც ბენდელიანმა ჟურნალისტებს განუცხადა, სამუშაოები 24-საათიან რეჟიმში ტარდება.

ამასთან, მისივე თქმით, დღეიდან ორი დღის განმავლობაში ცაბაძის ქუჩაზე და მიმდებარე მოედანზე საზოგადოებრივი ტრანსპორტისთვის მოძრაობა შეიზღუდება.

„ჩვენ ახლა, ვიმყოფებით წერეთლის გამზირზე, სადაც აქტიურ რეჟიმში მიმდინარეობს სარეაბილიტაციო სამუშაოები. ახლა იგება ასფალტის ქვედა საფარი. ზოგადად, ჩვენ მოსახლეობისთვის ნათქვამი გვაქვს, დავპირდით, რომ საგზაო მიმართულებით მუშაობა იანვრის ბოლოს უნდა დავასრულოთ, ეს პირობა შესრულდება. სამუშაოები 24-საათიან რეჟიმში გაგრძელდება. იანვრის ბოლოს, საგზაო მიმართულებით შეფერხება აღარ იქნება და ავტომობილები გადაადგილებას ორმხრივად შეძლებენ. ბუნებრივია, როდესაც ამ, მასშტაბის სამუშაოებზე ვსაუბრობთ გარკვეულ შეზღუდვებთან გვაქვს საქმე, დღეიდან ორი დღის განმავლობაში გვექნება ცაბაძის ქუჩაზე და მიმდებარე მოედანზე საზოგადოებრივი ტრანსპორტისთვის შეზღუდვა. სხვაგვარად შეუძლებელია ამ მასშტაბის სამუშაოების განხორციელება, ასფალტის საფარს ისე ვერ დავაგებთ და კომუნიკაციებს ისე ვერ შევცვლით, თუ მასზე მოძრაობა არ შევზღუდეთ. ამის გამო, მინდა მოსახლეობას ბოდიში კიდევ ერთხელ მოვუხადო, თუმცა, უკვე იანვრის ბოლოს ყველანაირი სამუშაოები საგზაო მიმართულებით დასრულებული იქნება და მოსახლეობასაც დისკომფორტი აღარ ექნება. ახლა იგება ქვედა ფენის ასფალტის საფარი, ამის შემდგომ მოხდება საკომუნიკაციო ჭების ნიშნულზე გასწორება, ბორდიურების ჩამოსხმა და უკვე შემდგომი ფენა ასფალტების დაგება. ამით უკვე საგზაო მიმართულებით სამუშაოები დასრულდება“, - განაცხადა ბენდელიანმა.

რაც შეეხება მიმდინარე სამუშაოების დროს საავტომობილო მოძრაობის მიმართულების ლოკალურად შეცვლას, ბენდელიანის განმარტებით, ამის შესახებ შეზღუდვამდე, წინასწარ მოსახლეობას ინფორმაციას მიაწვდიან.