მე, რა თქმა უნდა, მოხარული ვიქნები, თუ ტრამპი უკრაინელებს 24 საათში ომის დასასრულებლად „ჯადოსნურ ფორმულას“ შესთავაზებს, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, ჯოზეფ ბორელმა განაცხადა.

ჯოზეფ ბორელი აშშ-ის ყოფილი პრეზიდენტის, დონალდ ტრამპის განცხადებას გამოეხმაურა, რომლის მიხედვითაც თუ იგი 2024 წლის აშშ-ის საპრეზიდენტო არჩევნებში გაიმარჯვებს, უკრაინასა და რუსეთს შორის ომს 24 საათში დაასრულებს.

„გავიგე, პრეზიდენტმა ზელენსკიმ ტრამპი მიიწვია, რომ კიევში ჩასულიყო და გამოსავალი სწრაფად ეპოვა. ადამიანები, რომლებსაც ყველაზე მეტად სურთ მშვიდობა და ომის დასრულება, რა თქმა უნდა, უკრაინელები არიან“, - განაცხადა ბორელმა.

ცნობისთვის, გასულ კვირას, აიოვას შტატში გამართულ აშშ-ის "რესპუბლიკური პარტიის" პრაიმერიზში გამარჯვების შემდეგ, დონალდ ტრამპმა განაცხადა, რომ უკრაინაში არსებულ საშინელ სიტუაციას ძალიან სწრაფად მოაგვარებდა.