მიწვევა მივიღეთ, რეფორმების ჯგუფის სახელით შეხვედრას დავესწრები მე, - ამის შესახებ „სტრატეგია აღმაშენებლის“ ერთ-ერთმა ლიდერმა პაატა მანჯგალაძემ 29 იანვარს 9 პუნქტთან დაკავშირებით პარლამენტში დაგეგმილ სამუშაო შეხვედრასთან დაკავშირებით განაცხადა.
როგორც ის განმარტავს, თუკი შეხვედრები საქმეზე და შედეგზე იქნება ორიენტირებული, ამ ფორმატს გამოიყენებენ.
„ყველა ფორმატში მივიღებთ მონაწილეობას, რომელიც საქართველოს ევროპაში ინტეგრაციას ემსახურება, ჩვენ ამ ფორმატებს საქმიანი დისკუსიებისთვის გამოვიყენებთ, თუმცა, მეორე მხრიდან იმავეს მოლოდინი არ გვაქვს. „ქართულ ოცნებას“ ამის სურვილი, რომ ჰქონოდა - სასამართლოს, საარჩევნო, ანტიკორუფციული რეფორმის ჩატარების, ან თუნდაც, დეოლიგარქიზაციის, ამას 12 წლის მანძილზე გააკეთებდა, მაგრამ ეს იმას არ ნიშნავს, რომ ხელები ჩამოვუშვათ და „ქართული ოცნება“ მივუშვათ, ჩვენ ამ ფორმატებში მივიღებთ მონაწილეობას, რადგან საქართველოს მოქალაქეებს ნათლად დავანახოთ, თუკი სად არის უმუშევრობის, სიღარიბის სათავე...
წინასწარი მოლოდინი ცუდი მაქვს, მაგრამ გამიხარდება თუ შევცდები, ეს ისეთივე გეგმა იქნება, როგორიც აქამდე ჰქონდათ, სასამართლო რეფორმაზე ფასადური თქვეს, საარჩევნო რეფორმაზე თქვეს, რომ ეს არ არის ფუნდამენტურიო - რაც ვენეციის კომისიამ თქვა, რომელიც ყველაზე კვალიფიციური ევროპული ორგანიზაციაა. როცა ამას აკრიტიკებ და მურუსიძე მოგწონს, სხვა სტანდარტია. ჩვენ გვყავს სასამართლო სისტემა, რომლის ხელმძღვანელებიც და ლიდერებიც ჩვენი სტრატეგიული პარტნიორის, აშშ-ს მიერ სანქცირებულები არიან, რაც სერიოზული ზიანია, დაღია, რაც საქართველოში ინვესტიციების და დამატებითი სამუშაოების შემოსვლას უშლის ხელს“, - განაცხადა მანჯგალაძემ.
