ზურაბ ჭიაბერაშვილი და ირაკლი ქავთარაძე ბრიუსელში, ევროპის სახალხო პარტიის პოლიტიკურ საბჭოს ესწრებიან
„ერთიანი ნაციონალური მოძრაობის“ საერთაშორისო მდივანი ზურაბ ჭიაბერაშვილი და პარტიის საერთაშორისო დეპარტამენტის ხელმძღვანელი ირაკლი ქავთარაძე ბრიუსელში, ევროპის სახალხო პარტიის პოლიტიკურ საბჭოს ესწრებიან.
როგორც „ნაციონალური მოძრაობის“ მიერ გავრცელებულ ინფორმაციაშია აღნიშნული, საბჭოს დღის წესრიგში ევროპარლამენტის მომავალი არჩევნების წინ ევროპის სახალხო პარტიის წინასაარჩევნო პლატფორმის ფორმირებაა.
„ერთიანი ნაციონალური მოძრაობის“ წევრები მუშაობენ ევროპის ყველაზე დიდ პოლიტიკურ გაერთიანებაში შემავალ პარტნიორ პარტიებთან, რომ სახალხო პარტიამ ევროპულ დღის წესრიგში ევროკავშირის აღმოსავლეთით გაფართოების პრიორიტეტი შეინარჩუნოს.
„ევროპარლამენტის არჩევნებში სახალხო პარტიისა და ევროკავშირის გაფართოების მომხრე სხვა პოლიტიკური გაერთიანებების წარმატება გარანტია იქნება იმისა, რომ 2024 წლის შემოდგომაზე საქართველოში ხელისუფლების ცვლილებისა და ახალი კოალიციური მთავრობის ფორმირების შემდეგ, საქართველოს მოქალაქეებისათვისაც, ევროკავშირის მოქალაქეების მსგავსად, სწრაფადვე ხელმისაწვდომი გახდება ღირსეული და მაღალანაზღაურებადი სამუშაო ადგილები საკუთარ ქვეყანაში, სტაბილური ფასები, სიღარიბისგან დაცვის მყარი სოციალური სისტემა და უსაფრთხო გარემო,“ - განაცხადა ზურაბ ჭიაბერაშვილმა.
