შალვა პაპუაშვილი - ჩვენი გეგმაა, რომ მომავალი კვირის ბოლოსთვის, ხუთშაბათის სხდომაზე, განვიხილოთ მთავრობის შემადგენლობა, სამთავრობო პროგრამა და კენჭი ვუყაროთ მთავრობის ახალ შემადგენლობას

საქართველოს პარლამენტის თავმჯდომარის შალვა პაპუაშვილის განცხადებით, მომავალი კვირის ბოლოსთვის იგეგმება, რომ პლენარულ სხდომაზე განიხილონ მთავრობის ახალი შემადგენლობა და სამთავრობო გეგმა და კენჭი უყარონ მას.

მისი თქმით, მთავრობის ახალი შემადგენლობის საკომიტეტო მოსმენა შემდეგ კვირის ორშაბათიდან დაიწყება.

„ზოგადად პროცედურას რაც შეეხება, გეტყვით, ირაკლი კობახიძემ განაცხადა უკვე, რომ ის ხვალ მომართავს პარლამენტს მთავრობის შემადგენლობით და სამთავრობო პროგრამით. ხვალ, 17:00 საათზე ჩაინიშნება ბიუროს სხდომა და გვექნება დღის წესრიგის განხილვა. მომავალი კვირიდან, ორშაბათიდან, იქნება უკვე მთავრობის შემადგენლობის საკომიტეტო მოსმენები და ჩვენი გეგმა არის, რომ კვირის ბოლოსთვის, ხუთშაბათის სხდომაზე, დიდი ალბათობით, უკვე განვიხილოთ პლენარულ სხდომაზე მთავრობის შემადგენლობა და სამთავრობო პროგრამა და კენჭი ვუყაროთ მთავრობის ახალ შემადგენლობას“,- განაცხადა პაპუაშვილმა.

ჟურნალისტების კითხვის საპასუხოდ მან ასევე აღნიშნა, რომ პრობლემას ვერ ხედავს იმაში, თუ ოპოზიცია მხარს არ დაუჭერს მთავრობის ახალ შემადგენლობას.

„იმ მომენტში, როდესაც ოპოზიცია მხარს უჭერს მთავრობას, ის აღარ არის ოპოზიცია, ამიტომ აქ გასაკვირი არაფერი არ არის. თავისთავად ოპოზიცია არის ის პოლიტიკური ძალა, ვინც არ არის ხელისუფლებაში, ამიტომ გასაგებია, რომ მხარს არ დაუჭერენ მთავრობას. აქ პრობლემა არ არის“,- განაცხადა პაპუაშვილმა.