ღაზაში მიმდინარე ომის პროტესტის ნიშნად თურქეთში ორმა შეიარაღებულმა პირმა მძევლები აიყვანა. ამის შესახებ ინფორმაციას თურქული გამოცემა DHA ავრცელებს.

მათი ცნობით, ორმა შეიარაღებულმა პირმა თურქეთში მდებარე Proctor and Gamble-ის (P&G) ქარხანაში შვიდი მუშა მძევლად აიყვანა.

პოლიციამ ქარხანასთან მიმდებარე ქუჩები გადაკეტა და შეიარაღებულ პირებთან მოლაპარაკებების წარმოებას ცდილობს.

აშშ-ში მდებარე P&G-ის სათავო ოფისში მძევლების აყვანის შესახებ ინფორმაცია დაადასტურეს.

"დღეს ადრე, გებზეში მდებარე ჩვენი ქარხნის ევაკუაცია მოვახდინეთ და ადგილობრივ ოფიციალურ პირებთან ვმუშაობთ უსაფრთხოების გადაუდებელი სიტუაციის მოსაგვარებლად”,-განაცხადეს კომპანიის სათავო ოფისში.

ფოტოზე, რომელიც თურქულ მედიაში ვრცელდება, ეჭვმიტანილს შავ-თეთრი არაბული თავსაბურავი აქვს, რომელიც მის სახეს ფარავს და ხელში იარაღი უჭირავს. იგი კედელთან დგას, რომელზეც თურქეთისა და პალესტინის დროშებია გამოსახული წარწერით - “ჭიშკარი გაიღება. ან მუსალა [სალოცავი ადგილი] ან სიკვდილი”.