საქართველოს პარლამენტთან ონკოპაციენტების მხარდაჭერის მიზნით აქცია მიმდინარეობს.

ისინი მოითხოვენ, რომ ყველა ონკოპაციენტი ინდივიდუალურად, სრულად დაფინანსდეს და არა განსაზღვრული თანხის ოდენობით.

გარდა ამისა, აქციის მონაწილეები აცხადებენ, რომ ხელისუფლებამ ქვეყანაში ონკოლოგიური პაციენტების დაფინანსების და წამლების დეფიციტის კუთხით არსებული პრობლემები უნდა აღმოფხვრას.

ადგილზე მათ მოტანილი აქვთ პლაკატები წარწერით: “კავშირი სიცოცხლისთვის უმნიშვნელოვანესია”, “ერთად გადავარჩინოთ სიცოცხლე!”, “სიცოცხლისთვის ბრძოლის დრო არის ახლა!”, “ჩვენ ერთად ვიბრძვით სიცოცხლისთვის”, „მხარდაჭერა ონკოპაციენტებს”.

“ეს ორგანიზაცია შევქმენით ყოფილმა ონკოპაციენტებმა მიმდინარე ონკოპაციენტების მდგომარეობის გაუმჯობესების მიზნით. დღეს ჩვენს ქვეყანაში ჯანდაცვის კუთხით ძალიან ბევრი პრობლემაა. ჩვენ ხელისუფლებას მივმართავთ, რომ გვერდით დაგვიდგნენ. ჩვენ ერთად შევძლებთ ძალიან ბევრი ადამიანის სიცოცხლის გადარჩენას, თუ ისინი ხარვეზებს სწრაფად გამოასწორებენ, რადგან დრო ონკოპაციენტების სასარგებლოდ არ მუშაობს. ჩვენ მთავრობას ვთხოვთ, რომ სასწრაფოდ ჯანდაცვის სფეროში არსებული ხარვეზები გამოასწოროს, ეს შეეხება 25 000 ლარიან ლიმიტს, რომელიც ძირითად შემთხვევაში პაციენტებს არაფერში არ ჰყოფნით.

ჩვენ ვითხოვთ ინდივიდუალურ მიდგომას, კერძოდ, ინდივიდუალურ დაფინანსებას ყველა ონკოპაციენტებისთვის, მათი საჭიროების მიხედვით.

ასევე, ჩვენ ვითხოვთ, იმ სერვისებს, რაც მათ დიაგნოსტიკისთვის სჭირდებათ, რომ სახელმწიფოს მიერ დაფინანსდეს. ჩვენ ვთხოვთ სახელმწიფოს, შეეძლოს და დაარეგულიროს წამლების დეფიციტი, რომელიც მუდმივი პრობლემაა ონკოლოგიური პაციენტებისთვის.

ონკოლოგიურმა პაციენტებმა მითხრეს, რომ დაფინანსების დაგვიანება და წამლების დეფიციტი არის მუდმივი პრობლემა ჩვენს ქვეყანაში, რაც აუცილებლად უნდა გამოვასწოროთ, რაც შეიძლება სწრაფად”, - განაცხადა ორგანიზაცია “კავშირი სიცოცხლისთვის” დამფუძნებელმა, გვანცა აფხაიძემ.

აქციის დასასრულს ონკოპაციენტების მხარდამჭერებმა საქართველოს პარლამენტის მიმდებარე ტერიტორიიდან მთავრობის ადმინისტრაციამდე მსვლელობა გამართეს. მათ მთავრობის ადმინისტრაციასთან კიდევ ერთხელ გააჟღერეს მათი მოთხოვნები. აქციის მონაწილეები გეგმავენ, რომ 6 თებერვალს 12:00 საათზე პარლამენტთან საქართველოს პრეზიდენტს, სალომე ზურაბიშვილს დახვდნენ და მათი პრობლემები გააცნონ.