ისრაელი გაერო-ს პალესტინელ ლტოლვილთა დახმარების სააგენტოს საქმიანობის გამოსაძიებლად შექმნილ დამოუკიდებელ საგამოძიებო ჯგუფთან ითანამშრომლებს, - ამის შესახებ ისრაელის საგარეო საქმეთა მინისტრმა, ისრაელ კაცმა განაცხადა.
„გილოცავთ გაერო-ს საგამოძიებო კომიტეტის შექმნას. ჩვენ ყველა მტკიცებულებას წარვადგენთ, რომელიც გაერო-ს პალესტინელ ლტოლვილთა დახმარების სააგენტოს ტერორიზმთან კავშირს და რეგიონულ სტაბილურობაზე მის მავნე ზემოქმედებას აჩვენებს. აუცილებელია, რომ ამ კომიტეტმა სიმართლე გამოავლინოს, რაც სააგენტოს თავმჯდომარის დაუყოვნებლივ გადადგომას გამოიწვევს“, - განაცხადა ისრაელ კაცმა.
შეგახსენებთ, გაერო-ს გენერალურმა მდივანმა, ანტონიო გუტერეშმა განაცხადა, რომ დამოუკიდებელი საგამოძიებო ჯგუფი, რომელსაც საფრანგეთის საგარეო საქმეთა ყოფილი მინისტრი, კატრინ კოლონა უხელმძღვანელებს, გაერო-ს პალესტინელ ლტოლვილთა დახმარების სააგენტოს წინააღმდეგ არსებულ ბრალდებებს გამოიძიებს.