გაერო-ს უშიშროების საბჭოს 9 წევრმა, ეკვადორმა, საფრანგეთმა, იაპონიამ, მალტამ, სამხრეთ კორეამ, სლოვენიამ, შვეიცარიამ, დიდმა ბრიტანეთმა და აშშ-მა მიანმარის ხუნტას მოუწოდეს, მშვიდობიან მოსახლეობასა და სამოქალაქო ინფრასტრუქტურაზე თავდასხმები შეწყვიტოს. ამის შესახებ განცხადება გაერო-ში დიდი ბრიტანეთის წარმომადგენელმა, ბარბარა ვუდვორდმა გაავრცელა.

საბჭოს წევრი სახელმწიფოების წარმომადგენლები აცხადებენ, რომ მიანმარში სამხედრო კონტროლის დამყარებიდან სამი წლის შემდეგ ჰუმანიტარული დახმარება 18 მილიონზე მეტ ადამიანს ესაჭიროება და 2,6 მილიონი ადამიანი იძულებით გადაადგილებულ პირად ითვლება.

უშიშროების საბჭოს ცხრა წევრის მიერ გავრცელებულ განცხადებაში ნათქვამია, რომ გეგმა, რომელიც საბჭომ 2021 წლის აპრილში მიიღო და მიანმარში ძალადობის დასრულებას მოითხოვს, არ სრულდება. საბჭოს წევრები კონფლიქტის ყველა მხარეს მოუწოდებენ, რომ პატივი სცენ ადამიანის უფლებებს, ფუნდამენტურ თავისუფლებას, კანონის უზენაესობასა და მიანმარის მოსახლეობის დემოკრატიულ ნებასა და ინტერესებს.

შეგახსენებთ, რომ მიანმარში 2021 წლის სამხედრო გადატრიალების შემდეგ სამხედროებმა აუნ სან სუ ჩის მთავრობა ჩამოაგდეს და ქვეყანაში სამხედრო მმართველობა დაამყარეს.