ლევან დავითაშვილი ვაშაძეს - ემოციებზე თამაში პოლიტიკური ტრიუკია - გვესმის, რომ დღეს საქართველოში საუკეთესო მდგომარეობა არ არის და გაჭირვება ჯერ კიდევ პრობლემაა, ჩვენ არ ვართ ყველაზე მდიდარი ქვეყანა, რომელიც კეთილდღეობაში ცხოვრობს

ემოციებზე თამაში არის პოლიტიკური ტრიუკი და მეტი არაფერი, - ასე პასუხობს ეკონომიკისა და მდგრადი განვითარების მინისტრობის კანდიდატი, ლევან დავითაშვილი "სტრატეგია აღმაშენებლის“ ლიდერს, გიორგი ვაშაძეს, რომელმაც ქვეყანაში არსებულ სოციალურ პრობლემებზე ისაუბრა და აღნიშნა, რომ განცდა აქვს, პარლამენტში სხვა ქვეყნის ეკონომიკის მინისტრს უსმენს.

ლევან დავითაშვილის განცხადებით, პარლამენტში გიორგი ვაშაძის კითხვები წლების განმავლობაში არ იცვლება და ერთი და იმავე გამოსვლას ვისმენთ.

„ბატონი ვაშაძის კითხვა არ არის ახალი. ერთი და იმავე გამოსვლას ვისმენთ ხოლმე ბატონი გიორგი ვაშაძისგან. წლების განმავლობაში ტექსტი აბსოლუტურად ერთი და იგივეა, არ იცვლება არცერთი სიტყვა. არ ეხება საერთოდ სტატისტიკას, არ არის არცერთ სტატისტიკურ მონაცემზე დამყარებული. ეს არის მოსახლეობის ემოციებით თამაშის მცდელობა. გვესმის, რომ დღეს საქართველოში საუკეთესო მდგომარეობა არ არის და ჩვენ ქვეყანაში გაჭირვება ჯერ კიდევ მნიშვნელოვანი პრობლემა და გამოწვევაა. რა თქმა უნდა, ჩვენ არ ვართ ყველაზე მდიდარი ქვეყანა, რომელიც კეთილდღეობაში ცხოვრობს“, , - განაცხადა ლევან დავითაშვილმა.

ცნობისთვის, დღეს პარლამენტი ხუთი კომიტეტის გაერთიანებულ სხდომაზე მინისტრობის ოთხ კანდიდატს უსმენს.

კერძოდ, აგრარულ საკითხთა, გარემოს დაცვისა და ბუნებრივი რესურსების, დარგობრივი ეკონომიკისა და ეკონომიკური პოლიტიკის, რეგიონული პოლიტიკისა და თვითმმართველობის და საფინანსო-საბიუჯეტო კომიტეტების გაერთიანებულ სხდომაზე გარემოს დაცვისა და სოფლის მეურნეობის, ეკონომიკისა და მდგრადი განვითარების, რეგიონული განვითარებისა და ინფრასტრუქტურის და ფინანსთა მინისტრობის კანდიდატებს უსმენენ.