„ჰამასის" პასუხი “ცოტა ნამეტანია”, მაგრამ მძევლების გათავისუფლების შესახებ შეთანხმებაზე მოლაპარაკებები გრძელდება. ამის შესახებ აშშ-ის პრეზიდენტმა ჯო ბაიდენმა განაცხადა.

ბაიდენმა დაადასტურა, რომ „ჰამასმა“ მძევლების გათავისუფლების შესახებ შემოთავაზებულ ჩარჩოზე პასუხი გასცა, და აღნიშნა, რომ ამ მხრივ “რაღაც მოძრაობა” ყოფილა.

“პასუხი იყო მეორე მხარისგან, „ჰამასისგან“, მაგრამ ცოტა ნამეტანი ჩანს. ახლა მოლაპარაკებები გრძელდება”, - განაცხადა ბაიდენმა.

გამოსვლის დროს ბაიდენმა რესპუბლიკელი კონგრესის წევრები გააკრიტიკა ორპარტიული ფინანსური პაკეტის მიღებაზე უარის თქმისთვის.

აშშ-ის პრეზიდენტმა განმარტა, რომ აღნიშნული პაკეტი “ასევე აძლევს ისრაელს იმას, რაც საკუთარი ხალხის დასაცავად და საკუთარი თავის „ჰამასის“ ტერორისტებისგან დასაცავად სჭირდება და ის პალესტინელ ხალხს სასიცოცხლოდ მნიშვნელოვან ჰუმანიტარულ დახმარებას მიაწვდის”.

“ამ კანონპროექტთან დაპირისპირებით ისინი [რესპუბლიკელი კონგრესის წევრები] უარს ამბობენ დახმარებაზე იმ ადამიანებისთვის, რომლებიც ნამდვილად იტანჯებიან და სასწრაფოდ საჭიროებენ დახმარებას”, - განაცხადა ბაიდენმა.