ნევადის შტატში „დემოკრატიული პარტიის“ საპრეზიდენტო პრაიმერიზში ჯო ბაიდენმა გაიმარჯვა, - ამის შესახებ ინფორმაციას The Associated Press-ი ავრცელებს.

აშშ-ის პრეზიდენტმა, ჯო ბაიდენმა ხმების 89% მიიღო, ამომრჩეველთა 6%-მა „არცერთი ამ კანდიდატებიდან“-ს მისცა ხმა, რამაც მეორე ადგილი დაიკავა. მესამე ადგილზე ხმების 3%-ით მარიან უილიამსონი გავიდა.

ჯო ბაიდენმა გასულ შაბათს სამხრეთ კაროლინას პრაიმერიზშიც გაიმარჯვა, სადაც მან ხმების 96% მიიღო.

ნევადის შტატის „რესპუბლიკური პარტიის“ სიმბოლურ საპრეზიდენტო პრაიმერიზში „არცერთი ამ კანდიდატებიდან“-მა გაიმარჯვა. პრაიმერიზში ერთადერთი კანდიდატი ნიკი ჰეილი იყო, მას შემდეგ რაც ყოფილმა პრეზიდენტმა, დონალდ ტრამპმა ნევადის შტატის პრაიმერიზში მონაწილეობისგან თავი შეიკავა და ხუთშაბათს გასამართ „რესპუბლიკური პარტიის“ შიდაპარტიულ კენჭისყრაში ე.წ. „კოკუსში“ მიიღებს მონაწილეობას.