ყველა ქვეყანას აქვს თავისი ინდივიდუალური გამოწვევები, სადღაც ვიღაც წინ არის, სადღაც ვიღაც უკან არის, თუმცა თუ რეალურად გინდათ ნახოთ საქართველოს პროგრესი, წაიკითხეთ ევროკავშირის ანგარიში, - ამის შესახებ საქართველოს საგარეო საქმეთა მინისტრობის კანდიდატმა, ილია დარჩიაშვილმა 3 კომიტეტის გაერთიანებულ სხდომაზე განაცხადა, რითაც აღმოსავლეთ პარტნიორობის ინდექსის ანგარიშთან დაკავშირებით ოპოზიციონერი დეპუტატების კითხვებს უპასუხა.

მისივე თქმით, აღმოსავლეთ პარტნიორობის ინდექსის ანგარიშთან ევროკავშირს არანაირი კავშირი არ აქვს და თავად პლატფორმაც არ იღებს ანგარიშზე პასუხისმგებლობას, რადგან ექსპერტების შეფასებებს ეყრდნობა.

„მე არ მესმის, რატომ გიხარიათ ნებისმიერი მსგავსი ტიპის ნეგატიური ინფორმაცია. თუ თქვენ გინდათ, რომ გაიგოთ, ევროკავშირის რეალური შეფასებები ჩვენი ქვეყნის ევროინტეგრაციის გაზე, აუცილებლად უნდა წაიკითხოთ თავად ევროკავშირის ანგარიში. ზოგადად, მე არ ვემხრობი ქვეყნის ასე დეტალურ ერთმანეთთან შეფასებებს - ყველა ქვეყანას აქვს თავისი ინდივიდუალური გამოწვევები, სადღაც ვიღაცა წინ არის, სადღაც ვიღაც უკან არის, თუმცა თუ რეალურად გინდათ ნახოთ საქართველოს პროგრესი, წაიკითხეთ ევროკავშირის ანგარიში.

რაც შეეხება ინდექსს, რომელზეც თქვენ აპელირებთ - ამ ანგარიშს არანაირი კავშირი არ აქვს ევროკავშირთან. ევროკავშირის მხრიდანაც იყო ამის შეფასება და თვითონ პლატფორმაც კი არ იღებს ამ ანგარიშზე პასუხისმგებლობას რადგან ექსპერტების მიერ შექმნილი დოკუმენტი, რომელიც გამოხატავს შეფასებებს, თავად ექსპერტებს ეკუთვნის და ამ ინფორმაციის სიზუსტეზე ვერ იღებს თავად სამოქალაქო პლატფორმა პასუხისმგებლობას. შესაბამისად, მოგიწოდებთ, რომ თავი დაანებოთ მოსახლეობის შეცდომაში შეყვანას,“ - განაცხადა დარჩიაშვილმა.