მთავრობის ახალ შემადგენლობას ფრაქცია „ნაციონალური მოძრაობა-გაერთიანებული ოპოზიცია“ და ოპოზიციური პოლიტიკური ჯგუფები ერთობლივი სხდომის ფორმატში უსმენენ.

სამთავრობო პროგრამას პრემიერ-მინისტრობის კანდიდატი ირაკლი კობახიძე წარადგენს, შემდეგ კი ის დეპუტატების კითხვებს უპასუხებს.

სხდომას ფრაქცია „ნაციონალური მოძრაობის” თავმჯდომარე თინა ბოკუჩავა თავმჯდომარეობს. სხდომას არ ესწრებიან პარტია „ლელოსა” და „საქართველოსთვის” დეპუტატები.

გიორგი გახარიას პარტიის განმარტებით, მონაწილეობას არ მიიღებენ შეხვედრაში, რომელსაც „ნაციონალური მოძრაობა” ხელმძღვანელობს.

„ლელოს” განცხადებით კი, „ქართული ოცნება” რეგლამენტს არღვევს, როდესაც ფრაქციებსა და პოლიტიკურ ჯგუფებს მთავრობის ახალ შემადგენლობასთან ინდივიდუალურად შეხვედრის შესაძლებლობას არ აძლევს.

მთავრობის ახალ შემადგენლობას 8 თებერვალს ასევე მოუსმენს ფრაქცია „ქართული ოცნება“ და „ხალხის ძალა“.

საქართველოს მთავრობისთვის ნდობის გამოცხადების საკითხისა და სამთავრობო პროგრამის განხილვა კომიტეტებში, დარგობრივი სპეციალიზაციის მიხედვით, 5 თებერვალს დაიწყო, 8 თებერვალს კი პროცესი გაწერილი გრაფიკის თანახმად, უკვე პლენარულ სხდომაზე გადაინაცვლებს.

8 თებერვალს ჩანიშნულია პარლამენტის ბიუროს სხდომა, რომელიც კომიტეტებისა და ფრაქციების დასკვნების საფუძველზე, საქართველოს მთავრობის შემადგენლობისა და სამთავრობო პროგრამისთვის ნდობის გამოცხადების საკითხს პარლამენტის პლენარული სხდომის დღის წესრიგში ასახავს.

პარლამენტი იმავე დღეს (8 თებერვალს) უკვე პლენარულ სხდომაზე განიხილავს განახლებულ მინისტრთა კაბინეტის შემადგენლობასა და სამთავრობო პროგრამას. პარლამენტი საქართველოს მთავრობის შემადგენლობისთვის ნდობის გამოცხადების საკითხს პლენარულ სხდომაზე, კანონპროექტის პირველი მოსმენით განხილვისთვის რეგლამენტით დადგენილი წესით განიხილავს და კენჭს უყრის. შეგახსენებთ, პრემიერ-მინისტრის პოსტზე „ქართულმა ოცნებამ“ ირაკლი კობახიძე წარადგინა. მინისტრთა კაბინეტში ცვლილება მხოლოდ თავდაცვის მინისტრს შეეხო. ჯუანშერ ბურჭულაძეს ზუგდიდის მაჟორიტარი, პარლამენტის ვიცე-სპიკერი ირაკლი ჩიქოვანი შეცვლის. მთავრობის შემადგენლობა, პარლამენტის ბიუროს სამთავრობო პროგრამასთან ერთად 2 თებერვალს წარედგინა.