ეს რა სულისკვეთებაა ასეთი?! - თუ რეკომენდაციაში შეცდომა არის დაშვებული და პრაქტიკა ადასტურებს, რომ აშკარად შეცდომა არის დაშვებული, ჩვენი სუვერენული უფლებაა, კანონმდებლობა, რომელიც არ მუშაობას, გადაიხედოს და შეიცვალოს - ხომ არ გაუქმდა კონსტიტუციის შესაბამისი მუხლები?! - არ ვიცი, ცოტა ხნით გასული ვიყავი სიგარეტის მოსაწევად! - ეს განცხადება პარლამენტის პლენარულ სხდომაზე “ქართული ოცნების“ დეპუტატმა თენგიზ შარმანაშვილმა გააკეთა.

შარმანაშვილმა ხაზგასმით განაცხადა, რომ საქართველოში ცესკოს თავმჯდომარისა და წევრების 2/3-ით არჩევის დანაწესმა არ იმუშავა, ხოლო რამაც არ იმუშავა, არასწორია და უნდა შეიცვალოს.

მისივე თქმით, “საარჩევნო კოდექსთან“ დაკავშირებით ვენეციის კომისიამ პოლიტიკური რეკომენდაცია გასცა, რასაც სამართალთან არავითარი კავშირი არა აქვს.

“ჩვენ სუვერენიტეტში შეზღუდულები ვართ?! ის ბიბლიური ორგანოა და ვინაიდან თქვა, უკუნითი-უკუნისამდე ისე უნდა დარჩეს? არ არის არგუმენტი ის, რომ რაც ორი წელი არ მუშაობს, მას გადავხედოთ?

იცით, ეს დამოკიდებულება საიდან მოდის? ნახეთ, ჩვენმა ერთ-ერთმა კოლეგამ რა გკითხათ - ევროკავშირის წარმომადგენელს თუ შეუთანხმეთო - მათ ჰგონიათ, რომ ელჩი, რომელიც აქ ზის, მისი დანიშნულებაა, რომ სუვერენული სახელმწიფო მასთან მივიდეს და რაიმე კანონმდებლობაზე შეათანხმოს. ეს არის წარმოუდგენელი მიდგომა“, - განაცხადა შარმანაშვილმა პარლამენტის სხდომაზე.

საარჩევნო ცვლილებათა პაკეტს, რომლის საფუძველზეც ცესკოს წევრებისა და ცესკოს თავმჯდომარის არჩევის წესში ცვლილებები კიდევ ერთხელ ხორციელდება, პარლამენტი მეორე მოსმენით - მუხლობრივად განიხილავს.