მექსიკაში საქართველოს ელჩს ზაზა გაბუნიას, “საერთაშორისო თანამშრომლობაში, ჰუმანიზმში, მეცნიერებასა და ხელოვნებაში განსაკუთრებული წვლილისათვის, მექსიკის შეერთებულ შტატებსა და საქართველოს შორის სამართლებრივი ჩარჩოს შექმნისა და ქვეყნებს შორის პირველი უმაღლესი დონის ხელშეკრულების ხელმოწერისათვის, ლათინურ ამერიკაში მთავარი ქართული ეპოსის “ვეფხისტყაოსნის” პირველად გამოცემისა და ათასწლოვანი კულტურის ორი ერის დაახლოებისათვის ყოველდღიურად გაწეული დიდი ძალისხმევისთვის”, მეხიკოს შტატის უნივერსიტეტის (UAEM) დიდი პრემია გადასცეს. ამის შესახებ ინფორმაციას თავად მექსიკაში საქართველოს საელჩო ავრცელებს.

“როგორც ელჩს და დიპლომატს, მაქვს განსაკუთრებული პატივი, მივიღო ამერიკის კონტინენტის ერთ-ერთი ყველაზე ძველი, 1828 წელს დაარსებული, ქვეყნის პრეზიდენტებისა და სხვა არაერთი ისტორიული პირის ალმა-მატერის, ორსაუკუნოვანი ისტორიის მქონე მეხიკოს უნივერსიტეტის (UAEM) დიდი პრემია“, - აცხადებს ზაზა გაბუნია.

პრესტიჟული უნივერსიტეტის ჯილდოს მიღების შემდეგ, ელჩ ზაზა გაბუნიას შესაძლებლობა ჰქონდა საჯარო ლექცია წაეკითხა პროფესორებისა და სტუდენტების წინაშე.