2022 წლიდან დღემდე, დედაქალაქში ვანდალიზმის 963 ფაქტი დაფიქსირდა. ამის შესახებ ინფორმაცია „ინტერპრესნიუსს“ თბილისის მერიამ საჯარო ინფორმაციის მოთხოვნის საფუძველზე აცნობა.

უფრო კონკრეტულად, მხოლოდ 2023 წლის განმავლობაში, თბილისში ვანდალიზმის 428 შემთხვევა აღირიცხა, 2022 წელს კი, ქალაქის ინფრასტრუქტურის დაზიანების 535 ფაქტი დაფიქსირდა.

ვანდალიზმის ფაქტების მნიშვნელოვანი წილი პარკებისა და სკვერების ინფრასტრუქტურის დაზიანებაზე მოდის.

ამასთან, როგორც კონკრეტულად ისნისა და სამგორის რაიონული გამგეობების მიერ „ინტერპრესნიუსისთვის“ მოწოდებულ ინფორმაციაში აღნიშნული, ვინაიდან, კონკრეტული პიროვნებების იდენტიფიცირება ვერ ხერხდება, კონტრაქტორი კომპანიები ხელშეკრულების საგარანტიო ვადის ფარგლებში, საკუთარი ხარჯებით ახდენენ აღნიშნული დეფექტების გამოსწორებას.

დედაქალაქის მერიაში აცხადებენ, რომ თითოეულ შემთხვევაში ქალაქ თბილისის მუნიციპალიტეტის მერიის უსაფრთხოების საქალაქო სამსახურის მიერ მოხდა შესაბამისი რეაგირება.