წელს თავდაცვაზე მთლიანი შიდა პროდუქტის 2%-ს ნატო-ს 18 მოკავშირე დახარჯავს, - ამის შესახებ ნატო-ს გენერალურმა მდივანმა, იენს სტოლტენბერგმა განაცხადა.

სტოლტენბერგმა აღნიშნა, რომ ნატო-ს ევროპული ქვეყნები წელს თავდაცვაში 380 მილიარდი დოლარის ინვესტიციას განახორციელებენ.

ნატო-ს გენერალური მდივნის თქმით, აშშ-ის ყოფილი პრეზიდენტი, დონალდ ტრამპი თავისი განცხადებებით ალიანსის უსაფრთხოებას ზიანს აყენებს.

„ნატო-მ ალიანსზე თავდასხმის აღკვეთა 75 წლის განმავლობაში შეძლო. ნატო-ს იდეა და აქცენტი ომის თავიდან აცილებაა. ნებისმიერი წინადადება, რომ ჩვენ ერთმანეთს არ დავიცავთ, ჩვენს უსაფრთხოებას ძირს უთხრის“, - აღნიშნა ნატო-ს გენერალურმა მდივანმა.

მისივე თქმით, ალიანსი მოკავშირეებს დაიცავს.

„ჩემი გზავნილი არის ის, რომ ჩვენი შეკავების სისტემის შელახვა საჭირო არ არის. ჩვენ ეჭვი არ გვეპარება, რომ ჩვენი მოკავშირეების დასაცავად მზად ვართ“, - განაცხადა იენს სტოლტენბერგმა.

შეგახსენებთ, რამდენიმე დღის წინ, დონალდ ტრამპმა განაცხადა, რომ აშშ-მა, შესაძლოა, რუსეთის პოტენციური შეჭრისგან ნატო-ს ის მოკავშირეები არ დაიცვას, რომლებიც საკუთარ თავდაცვაზე საკმარისს არ ხარჯავენ და მეტიც, შესაძლოა, რუსეთი წაახალისოს. „ფაქტობრივად, მე მათ წავახალისებდი, გააკეთონ ის, რა ჯანდაბაც უნდათ“, - აღნიშნა ტრამპმა.