მძევლების გასათავისუფლებლად ძლიერი სამხედრო ზეწოლა და მყარი მოლაპარაკებებია საჭირო, - ამის შესახებ ისრაელის პრემიერ-მინისტრმა ბენიამინ ნეთანიაჰუმ ვიდეომიმართვაში განაცხადა.

ნეთანიაჰუმ კვლავ გააჟღერა საკუთარი აზრი, რომ „ჰამასი“ დაზავების შესახებ კაიროში მიმდინარე მოლაპარაკებების საბოტაჟს ახდენს თავისი „გიჟური მოთხოვნებით“.

„ამ კვირას ორი მძევალი გავათავისუფლეთ ფრთხილ სამხედრო ოპერაციაში. ამ მომენტისთვის 112 მძევალი გავათავისუფლეთ ძლიერი სამხედრო ზეწოლისა და მყარი მოლაპარაკებების კომბინაციით. ეს ასევე არის მეტი მძევლის გათავისუფლების გასაღები - ძლიერი სამხედრო ზეწოლა და მყარი მოლაპარაკებები…

დაჟინებით მოვითხოვ „ჰამასმა“ უარი თქვას თავის გიჟურ მოთხოვნებზე და როდესაც ამ მოთხოვნებს დაანებებენ თავს, წინსვლა შეგვეძლება“, - განაცხადა ნეთანიაჰუმ.

ცნობისთვის, აქამდე ნეთანიაჰუმ უარი განაცხადა ისრაელის დელეგაციის გაგზავნაზე ხუთშაბათს, კაიროში დაგეგმილ მძევლების გათავისუფლების მოლაპარაკებებზე.