ავსტრალიის, კანადისა და ახალი ზელანდიის პრემიერ-მინისტრებმა ერთობლივი განცხადება გაავრცელეს და ისრაელი გააფრთხილეს, რომ ღაზის სექტორის ქალაქ რაფაჰში სახმელეთო შეტევის დაწყება კატასტროფული იქნება.

„ჩვენ სერიოზულად შეშფოთებულები ვართ იმის გამო, რომ ისრაელი გეგმავს სახმელეთო შეტევას რაფაჰში“, - ნათქვამია განცხადებაში და ხაზგასმულია, რომ ნებისმიერი სამხედრო ქმედება ტერიტორიაზე, სადაც თითქმის 1.5 მილიონი პალესტინელი აფარებს თავს, კატასტროფული იქნება.

ავსტრალიის, კანადისა და ახალი ზელანდიის პრემიერ-მინისტრებმა გაიხსენეს მართლმსაჯულების საერთაშორისო სასამართლოს გადაწყვეტილება, რომელმაც დაავალა ისრაელს უზრუნველყოს აუცილებელი ჰუმანიტარული დახმარების მიწოდება და მშვიდობიანი მოსახლეობის დაცვა ღაზაში.

„სასწრაფოდ საჭიროა ჰუმანიტარული ცეცხლის შეწყვეტა“, - ნათქვამია განცხადებაში.

ამასთან, სამი ქვეყნის ლიდერები აცხადებენ, რომ ნებისმიერი ცეცხლის შეწყვეტა არ შეიძლება იყოს ცალმხრივი და რომ ღაზაში მყოფი ისრაელის ყველა მძევალი უნდა გათავისუფლდეს.