„ქართული ოცნების“ თავმჯდომარის, ირაკლი ღარიბაშვილის განცხადებით, გავრცელებული ინფორმაცია, თითქოს, მისი გარემოცვის წევრები, შესაძლო კორუფციის ფაქტებზე გამოძიების ფარგლებში, სუს-ში დაკითხვაზე დადიან სიცრუეა.

ამის შესახებ მან პარტიის ოფისში ჟურნალისტების კითხვების საპასუხოდ აღნიშნა.

„[ირაკლი ღარიბაშვილის უახლოესი გარემოცვა დადის სუს-ში დაკითხვაზე] ეს არის სრული სიცრუე და მორიგი დემაგოგია. თქვენ ახლა ხალხს უყვებით ზღაპრებს. არავის სჯერა თქვენი ზღაპრების, მორიგი მოგონილი სისულელე. თქვენ იკითხეთ კონკრეტული გვარები [რომეო მიქაუტაძე, ჯუანშერ ბურჭულაძე], არც ჩემთვის, არც გუნდის წევრებისთვის არ არსებობს მსგავსი ინფორმაცია. არავის სმენია მსგავსი ფაქტის, ბუნებაში არ მომხდარა ასეთი რამ და თქვენ ატყუებთ ხალხს“,- განაცხადა ღარიბაშვილმა. ცნობისთვის, მედიაში გავრცელებული ინფორმაციის მიხედვით, კორუფციის ფაქტების გამოძიების ფარგლებში, სუს-ში რამდენიმე უწყების მაღალი თანამდებობის პირი დაკითხვაზე იყო მისული.