სამწუხაროა, მიუნხენის კონფერენციაზე საქართველო ცუდად წარმოჩინდა - ქვეყანა საერთაშორისო პარტნიორების მხრიდან აღიარებულია, როგორც მიტაცებული სახელმწიფო, სადაც ოლიგარქი ივანიშვილი წარმართავს ყველა პროცესს,- ამის შესახებ ჟურნალისტებთან „ნაციონალური მოძრაობის“ დეპუტატმა ლევან ბეჟაშვილმა განაცხადა, რითაც გამოეხმაურა ინფორმაციას იმის თაობაზე, რომ მიუნხენის კონფერენციის ანგარიშში ბიძინა ივანიშვილი პრორუს ოლიგარქად არის მოხსენიებული.

ბეჟაშვილის თქმით, საქართველოში პოლიტიკურ პროცესებს ივანიშვილი წარმართავს და ყველა მინისტრი მას ემსახურება.

„მიუნხენის კონფერენცია მნიშვნელოვანი საერთაშორისო ფორუმია, სადაც ცალკეულ ქვეყნებთან მიმართებით საერთაშორისო პოლიტიკის კონტურები ყალიბდება. სამწუხაროა, რომ საქართველო ამ მიმართულებით ცუდად გამოირჩა, რადგან ქვეყანა აღიარებულია საერთაშორისო პარტნიორების მხრიდან, როგორც მიტაცებული სახელმწიფო, სადაც ოლიგარქი ივანიშვილი წარმართავს ყველა პროცესს. ამიტომ, ბუნებრივია, „ქართული ოცნების“ დამოკიდებულება კონფერენციაში პრეზიდენტის მონაწილეობაზე სუბიექტურია. „ქართული ოცნება“ ივანიშვილის პარტიაა, პრემიერ-მინისტრი ივანიშვილის ფუნქციას ასრულებს და ყველა მინისტრი მხოლოდ ივანიშვილის სამსახურშია. როცა ასეთი ვითარებაა ქვეყანაში, აქ არც დიდი ინვესტიციები ჩაიდება, არც თავისუფალი ეკონომიკა იქნება, შესაბამისად, არც მოსახლეობის სოციალურ-ეკონომიკური პირობები გაუმჯობესდება“, - განაცხადა ბეჟაშვილმა.