ვფიქრობ, რომ არც ევროპული კავშირის საელჩო დაინტერესდება დიდად მისი [შალვა პაპუაშვილის] შეხედულებებით იმასთან დაკავშირებით, თუ ვის უნდა გაუხსნან და არ უნდა გაუხსნან კარი - პაპუაშვილი არის „მარტის კანონის“ ავტორი და როდესაც დემოკრატიასა და ევროპაზე საუბრობს, ეს არის ცინიზმის მწვერვალი, - ამის შესახებ პარტია „ლელოს“ ერთ-ერთმა ლიდერმა, გრიგოლ გეგელიამ განაცხადა, რითაც გამოეხმაურა პარლამენტის თავმჯდომარის, შალვა პაპუაშვილის განცხადებას, რომლის თანახმად, „სამწუხაროა, რომ ზუსტად მაშინ, როდესაც „ლელო“ საპარლამენტო მუშაობის ბოიკოტშია, მას ევროკავშირის რეზიდენციაში კარს უხსნიან და ხვდებიან“.

მისივე თქმით, პარლამენტის თავმჯდომარე, შალვა პაპუაშვილი „არის თხემით ტერფამდე ლავროვის და პუტინის მსახური და მას არაფერი საერთო არ გააჩნია არც გერმანიასთან, რომელშიც სწავლობდა და არც ევროპულ ღირებულებებთან “.

„ეწყინა? - კარგია. ბატონი პაპუაშვილი წარმოადგენს ხელისუფლებას, რომელიც ღიად ესხმის თავს ევროპული კავშირის და აშშ-ის ელჩებს, ევროპულ და ამერიკულ ინსტიტუტებს, ამიტომ მისი აზრი ევროკავშირის საელჩოზე თუ პროცესებზე ვერავისთვის ვერ იქნება არსებითი. ვფიქრობ, რომ არც ევროპული კავშირის საელჩო დაინტერესდება დიდად მისი შეხედულებებით იმასთან დაკავშირებით, თუ ვის უნდა გაუხსნან და არ უნდა გაუხსნან კარი. პაპუაშვილი არის „მარტის კანონის“ ავტორი, როდესაც ის საუბრობს დემოკრატიაზე და ევროპაზე, ეს არის ცინიზმის მწვერვალი. ის არის რუსი, ის არის თხემით ტერფამდე ლავროვის და პუტინის მსახური და მას არაფერი საერთო არ გააჩნია არც იმ გერმანიასთან, რომელშიც სწავლობდა და რომელსაც ციტირებს და არც ევროპულ ღირებულებებთან“, - განაცხადა გეგელიამ.