ივანიშვილის პარტია არ აპირებს ფუნდამენტური ცვლილებების გატარებას, რომელიც ინსტიტუციებს მისცემს დამოუკიდებლობას, ხალხთან გახდის ანგარიშვალდებულს და არა ბიძინა ივანიშვილთან, - ამის შესახებ ფრაქცია „ნაციონალური მოძრაობის“ წევრმა თინა ბოკუჩავამ განაცხადა.

მისივე თქმით, 9 რეკომენდაციის შესასრულებლად აუცილებელია ხელისუფლების ცვლილება.

„დღეს სამი საკითხი განიხილება, მათ შორის, სასამართლოს და ანტიკორუფციული ბიუროს საკითხები, მაგრამ ყველა საკითხის განხილვისას (ჯერჯერობით ორია განხილული), ვხედავთ, რომ ივანიშვილის პარტია არ აპირებს ფუნდამენტური ცვლილებების გატარებას, რომელიც ინსტიტუციებს მისცემს დამოუკიდებლობას, ხალხთან გახდის ანგარიშვალდებულს და არა ბიძინა ივანიშვილთან. ამაზე მეტყველებს მათ შორის, დღევანდელი შეხვედრის მიმდინარეობა. ეს კიდევ ერთხელ მეტყველებს, რომ 9 დათქმის შესასრულებლად აუცილებელია ხელისუფლების ცვლილება. ახალი ხელისუფლების პირობებში, პირველივე ას დღეში შეგვიძლია ეს 9 დათქმა სრულად იყოს შესრულებული და დაჩქარებულად გახდეს ჩვენი ქვეყანა ევროკავშირის წევრი”, - განაცხადა ბოკუჩავამ.

ევროკავშირის მიერ განსაზღვრულ 9 რეკომენდაციასთან დაკავშირებით, პარლამენტში რიგით მეორე შეხვედრა იმართება. დღევანდელ სამუშაო შეხვედრაზე 3 საკითხს განიხილავენ, კერძოდ, სპეციალურ საგამოძიებო სამსახურთან და პერსონალურ მონაცემთა დაცვის სამსახურთან, ანტიკორუფციულ ბიუროსთან და საერთო სასამართლოებთან დაკავშირებულ ცვლილებებს. შეხვედრას ესწრებიან პარლამენტის თავმჯდომარე, საპარლამენტო უმრავლესობისა და ოპოზიციის წარმომადგენლები. არასამთავრობო სექტორიდან კი მასში მხოლოდ აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციების წარმომადგენლები მონაწილეობენ. საპარლამენტო ოპოზიციიდან შეხვედრას არ ესწრებიან "ლელოს"დეპუტატები, მათი შეფასებით, ეს პროცესი იმიტაციაა.