რუსეთი შვედეთის უსაფრთხოების ყველაზე დიდ გამოწვევას წარმოადგენს, - ამის შესახებ შვედეთის უშიშროების სამსახურის ხელმძღვანელმა, შარლოტა ფონ ესენმა განაცხადა.

„ჩვენ ყველამ უსაფრთხოებასთან დაკავშირებულ სერიოზულ ვითარებაში ცხოვრება უნდა ვისწავლოთ. უპირველეს ყოვლისა, რუსეთი, მაგრამ ასევე ჩინეთი და ირანი შვედეთისთვის უდიდეს საფრთხეს წარმოადგენენ. გარკვეულწილად, უსაფრთხოების არსებული სისტემის შესაცვლელად ისინი ერთად მუშაობენ“, - განაცხადა შარლოტა ფონ ესენმა.

შვედეთის უშიშროების სამსახურის ოპერაციების ხელმძღვანელმა, ფრედრიკ ჰოლსტრომმა აღნიშნა, რომ დასავლეთიდან რუსი ჯაშუშების გაძევებასთან ერთად, მოსკოვი ტაქტიკას ცვლის და „უფრო ოპორტუნისტულ მეთოდებს იყენებს“.

შეგახსენებთ, შვედეთის ნატო-ში გაწევრიანების წინადადების რატიფიცირება უნგრეთის გარდა, ალიანსის ყველა სახელმწიფომ მოახდინა.