გიორგი სიორიძე ვერ გამოვიდა პარტიული მიკერძოებიდან , - ამის შესახებ ცესკოს თავმჯდომარემ, გიორგი კალანდარიშვილმა განაცხადა.

როგორც მან „პალიტრანიუსის“ გადაცემაში „რეზიუმე“ აღნიშნა, პირი პარტიის მიერ არის დანიშნული თუ პროფესიული ნიშნით არჩეული, ვალდებულია მოქმედებდეს ადმინისტრაციის ინტერესებით.

თუმცა, მისი თქმით, ახლა უფრო მნიშვნელოვანი საკითხები არსებობს, ვიდრე მოადგილის პოზიციის გაუქმება.

„ადმინისტრაციის საქმიანობაში მნიშვნელოვანი პერიოდი დგას, ვემზადებით 26 ოქტომბრის არჩევნებისთვის და სხვა უფრო მნიშვნელოვანი საკითხებია, ვიდრე მოადგილის პოზიციის გაუქმება, რომელსაც ამ ორ წელიწად-ნახევრის განმავლობაში ინსტიტუციის საქმიანობაში არაფერი გაუკეთებია. ვერ გამოვიდა პარტიული მიკერძოებიდან და არა თუ პარტიული მიკერძოებიდან გამოვიდა, არამედ რამდენიმე კვირის წინ, მან პოლიტსაბჭოს წევრის პოზიცია დაიკავა და ამით უფრო გაიმყარა პოლიტიკური პარტიული ბეგრაუნდი.

ცენტრალური საარჩევნო კომისიის რეგლამენტი ამბობს: მიუხედავად იმისა, რომ პირი პარტიის მიერ არის დანიშნული თუ პროფესიული ნიშნით არჩეული, პირველ რიგში, ის ვალდებულია მოქმედებდეს ადმინისტრაციის ინტერესებით. რა თქმა უნდა, პოლიტიკური და პარტიული დღის წესრიგი უნდა დატოვოს.

ყველასთვის ხელმისაწვდომია ის განცხადებები, სადაც ის პარტიული მიკერძოებიდან ვერ გამოვიდა“, - განაცხადა კალანდარიშვილმა.

მისივე მოსაზრებით, სრული კოლაფსი იქნებოდა ასეთი პირის მიერ ადმინისტრაციის ხელმძღვანელის პოზიციის დაკავება.

„კანონმდებლობა ითვალისწინებს იმას, რომ მოქმედ თავმჯდომარეს, მოქმედ კომისიის წევრს უფლებამოსილება უგრძელდება მანამ, სანამ არ მოხდება ახლით ჩანაცვლება. შესაბამისად, ჩემი უფლებამოსილების ვადა სრულ უფლებამოსილებაშია და არის მანამ, სანამ მოხდება ახლით ჩანაცვლება.

პირს, რომელსაც თავმჯდომარის მოადგილეობაზე აქვს პრეტენზია და ამბიციები აქვს ადმინისტრაციის მართვასთან დაკავშირებით, არა ერთი გადაწყვეტილება გვინახავს, როდესაც მის მიერ მხარდაჭერილი არ ყოფილიყო. ეს იმაზე მიუნიშნებს, რომ სრული კოლაფსი იქნებოდა ასეთი პირის მიერ ადმინისტრაციის ხელმძღვანელის პოზიციის დაკავება“, - განაცხადა კალანდარიშვილმა.

კითხვაზე, რა უფლებამოსილება აქვს თავმჯდომარეს, რომლითაც შეუძლია გავლენა მოახდინოს არჩევნებზე, კალანდარიშვილმა აღნიშნა, რომ „მოადგილის პოზიციის ყოფნა არ ყოფნას კომისიურ გადაწყვეტილებებთან მიმართებაში ვერანაირი გავლენა ვერ ექნება“.