ვენესუელაში მაღაროს ჩამონგრევის შედეგად 15 ადამიანი დაიღუპა, - ამის შესახებ ინფორმაციას ვენესუელის პრეზიდენტი, ნიკოლას მადურო ავრცელებს.

ვენესუელის პრეზიდენტის, ნიკოლას მადუროს ცნობით, ბოლივარის შტატის ქალაქ ლა პარაგუაში არალეგალურად მოქმედ ოქროს მაღაროში მიწის კედლის ჩამონგრევის შედეგად 15 ადამიანი დაიღუპა და 11 დაშავდა.

„ჩვენ სამოქალაქო თავდაცვის ჯგუფები დაუყოვნებლივ გავგზავნეთ, ბოლივარის შტატის გუბერნატორთან, ანხელ მარკანოსთან ერთად სამაშველო ოპერაციას გავააქტიურებთ“, - განაცხადა ნიკოლას მადურომ.

მადურომ აღნიშნა, რომ სამძებრო-სამაშველო ჯგუფები დაკარგული მაღაროელების ძებნას სახმელეთო და საჰაერო გზებით აგრძელებენ.