პრემიერ-მინისტრ ირაკლი კობახიძის განცხადებით, პარტიების და პოლიტიკური სუბიექტების ირიბი დაფინანსება ფიქტიური არასამთავრობო ორგანიზაციების მეშვეობით, არასწორი პრაქტიკაა. ასე უპასუხა მან ჟურნალისტების კითხვას, როგორ შეაფასებდა პარტიების არასამთავრობო ორგანიზაციების მხრიდან შესაძლო დაფინანსების საკითხს.

ამასთან, ირაკლი კობახიძემ აღნიშნა, რომ პარტიების ირიბი დაფინანსების საკითხი მოწესრიგებულია მოქმედი კანონმდებლობით და ამ მიმართულებით ახალი კანონების მიღება არ იგეგმება.

„რაც შეეხება დაფინანსებას, საუბარი იყო არა არასამთავრობოების დაფინანსებაზე, არამედ პარტიების, პოლიტიკური სუბიექტების ირიბ დაფინანსებაზე ფიქტიური არასამთავრობო ორგანიზაციების მეშვეობით, რაც არის არასწორი პრაქტიკა. რაც შეეხება ახალი კანონების მიღებას, ასეთი რამ არ იგეგმება. ზოგადად, პარტიების ირიბი დაფინანსების საკითხი მოწესრიგებულია მოქმედი კანონით, ეს არის გაერთიანებების შესახებ ორგანული კანონი, ამ კანონის ფარგლებში თუ რაიმე ზომები იქნება მიღებული, ეს არის ანტიკორუფციული სამსახურის საქმე, ამის მიღმა რაიმე საკანონმდებლო ცვლილებები არ იგეგმება“, - განაცხადა კობახიძემ.