ევროკომისია ევროკავშირის ფონდებიდან პოლონეთისთვის 137 მილიარდი ევროს განბლოკვას გეგმავს. ამის შესახებ ევროკომისიის პრეზიდენტმა, ურსულა ფონ დერ ლაიენმა ვარშავაში პოლონეთის პრემიერ-მინისტრ, დონალდ ტუსკთან გამართულ პრესკონფერენციაზე განაცხადა.
„კარგი ამბები მაქვს: შემდეგ კვირას ევროკომისია ორ გადაწყვეტილებას მიიღებს ევროპულ ფონდებთან დაკავშირებით, რომლებიც ახლა დაბლოკილია პოლონეთისთვის. ეს გადაწყვეტილებები პოლონეთისთვის 137 მილიარდ ევრომდე გამოათავისუფლებს. საუბარია ერთიანობის ფონდიდან სახსრებზე და “ევროკავშირის მომავალი თაობა” გეგმის სახსრებზე”, - განაცხადა ფონ დერ ლაიენმა.
აღნიშნული სახსრების განბლოკვას ევროკომისია პოლონეთში კანონის უზენაესობის სფეროში რეფორმების აუცილებლობას უკავშირებდა, რომელთა რეალიზაციაც ბრიუსელმა ახლა ეფექტიანად ჩათვალა.
„ეს მნიშვნელოვანი დღეა ყველა ჩვენგანისთვის. პრემიერ-მინისტრის თანამდებობაზე ყოფნის პირველივე დღეებიდან მიზანი მდგომარეობდა, მათ შორის, კანონის უზენაესობისა და დემოკრატიული სტანდარტების აღდგენაში”, - განაცხადა ტუსკმა.
მისი თქმით, განბლოკილი სახსრები მცირე და საშუალო სასოფლო-სამეურნეო მწარმოებლების მხარდაჭერაზე იქნება მიმართული.
