განწყობა არის ისეთი, რომ გაუმჯობესება მოხდეს იმ პირობებისა, რა პირობებშიც არის რესპუბლიკური საავადმყოფო და შემდგომში, როდესაც აშენდება ახალი, მსოფლიო სტანდარტების საავადმყოფო, რაც ყველასთვის გასახარია, გავაგრძელებთ იქ მუშაობას. რაც მთავარია, რესპუბლიკურის მომსახურება არ მოაკლდება არც ქალაქს, არც ქვეყანას და არც ერთ პაციენტს, - ამის შესახებ რესპუბლიკური საავადმყოფოს ქირურგმა კახი ხუციშვილმა საავადმყოფოსთან დაკავშირებით, მთავრობის მიერ მიღებულ გადაწყვეტილებაზე განაცხადა.

ამასთან, მან აღნიშნა, რომ საავადმყოფოს იმ თანამშრომლებს, რომლებმაც კომპენსაციის მიღებაზე თანხმობა განაცხადეს, სურვილის შემთხვევაში რესპუბლიკურ საავადმყოფოში მუშაობის გაგრძელების საშუალება ექნებათ.

„თუ შემდგომში ტერიტორიის ნაწილი გამოყენებული იქნება რაიმე საინვესტიციო გეგმებისთვის, ეს ჩვენთვის აბსოლუტურად გასაგები იქნება და ჩვენ წინააღმდეგობას ამაზე არ გავწევთ, პირიქით, ჩვენი ერთ-ერთი ვერსია იყო ასეთი და არც ველოდით, რომ ამ ვერსიას ასე კარგად მიიღებდნენ, ყოველგვარ მოლოდინს გადააჭარბა ამ ყველაფერმა. რაც შეეხება თანამშრომლებს, რაღაც ნაწილს, ვისაც ხელი ჰქონდათ მოწერილი კომპენსაციაზე ის ჩაერიცხათ. იქნებიან ადამიანები, ვისაც აღარ უნდათ იქ მუშაობა და დატოვებენ კოლექტივს, და ვისაც ამის სურვილი ექნება უკან დაბრუნდება, ამას არავინ არ შეეწინააღმდეგება. შენობის მდგრადობის საკითხზე ვიტყვი, რომ ამჟამად საუბარი არ ყოფილა, თუმცა პირდაპირ გეტყვით, რომ ფასადი ნამდვილად ავარიული იყო. ამ ფასადმა გამოიწვია პროცესების დაჩქარება. მე შემიძლია გითხრათ, რომ დღეს მიდგომა და განწყობა არის ისეთი, რომ გაუმჯობესება მოხდეს იმ პირობებისა, რა პირობებშიც არის რესპუბლიკური საავადმყოფო და შემდგომში, როდესაც აშენდება ახალი მსოფლიო სტანდარტების საავადმყოფო, რაც ყველასთვის გასახარია, გავაგრძელებთ იქ მუშაობას და რაც მთავარია, რესპუბლიკურის მომსახურება არ მოაკლდება არც ქალაქს, არც ქვეყანას და არც ერთ პაციენტს“,- განაცხადა კახი ხუციშვილმა.