დასავლეთის ქვეყნების სამხედროების უკრაინაში განლაგება აუცილებლად არ ნიშნავს რუსეთის წინააღმდეგ სამხედრო ქმედებებში მათ მონაწილეობას. ამის შესახებ საფრანგეთის საგარეო საქმეთა მინისტრმა სტეფან სეჟურნემ განაცხადა.

საფრანგეთის პრეზიდენტის, ემანუელ მაკრონის უკრაინაში სამხედროების გაგზავნის შესაძლებლობის შესახებ კომენტარის გაკეთებისას, სეჟურნემ აღნიშნა, რომ უკრაინაში დასავლეთის ქვეყნების სამხედროების განლაგება “საომარ ზღვარს” არ გასცდება.

სეჟურნეს განმარტებით, ის ისეთ ოპერაციებს გულისხმობს, როგორებიცაა განაღმვა, კიბერუსაფრთხოება ან უკრაინის ტერიტორიაზე იარაღის წარმოება.

“ამ ქმედებებიდან ზოგიერთი შესაძლოა უკრაინის ტერიტორიაზე ყოფნას მოითხოვდეს, “საომარი ზღვრის” გაცდენის გარეშე”, - განაცხადა სეჟურნემ.

მისი თქმით, რუსეთის აგრესიის ფონზე დასავლეთის ქვეყნებს “უკრაინის მხარდაჭერის მხრივ ახალი ქმედებების განხილვა” მოუწიათ.