პოლონეთი ევროკომისიის ხელმძღვანელთან, ურსულა ფონ დერ ლაიენთან არაფორმალურ მოლაპარაკებებს აწარმოებს, რათა ქვეყანა „მწვანე შეთანხმების“ წესების ნაწილისგან გაათავისუფლონ, - მედიის ინფორმაციით, შესაბამისი განცხადება პოლონეთის საგარეო საქმეთა მინისტრის მოადგილემ ანჯეი შეინამ გააკეთა.

მისი თქმით, პოლონეთისთვის, რომელიც უკრაინასთან მდებარე ყველაზე დიდი სასოფლო-სამეურნეო ბაზარია, შესაძლოა, გამონაკლისი დაუშვან.

შეინის განმარტებით, ის ეხება როგორც „მწვანე შეთანხმებას“, ასევე "პროდუქტების ნაკადს, რომელიც გამოიწვევს მუდმივ შეფერხებას ერთი ან მეტი ქვეყნის ბაზარზე".

„თუ შევძლებთ ევროკავშირში პოლონეთის მოთხოვნებზე შეთანხმებას, ის, შესაძლოა, კავშირის საერთო პოზიცია გახდეს. მინდა, პრემიერ ტუსკის განცხადების ციტირება მოვახდინო: თუ ამას ძალიან დიდი დრო სჭირდება, ჩვენ განვახორციელებთ ცვლილებებს, ცალმხრივად შემოვიღებთ სასაზღვრო ბლოკადებსა და ტარიფებს“, - განაცხადა ანჯეი შეინამ.

მისი თქმით, 28 მარტს უკრაინულ მხარესთან კონსულტაციების დროს „საზღვრის პრობლემის თემა აღარ იარსებებს“.

უკრაინის სახელმწიფო სასაზღვრო სამსახურმა გუშინ გაავრცელა ინფორმაცია, რომ პოლონელი ფერმერები პოლონეთი-უკრაინის საზღვარზე ექვს მიმართულებას ბლოკავენ და რიგში 2 ათასზე მეტი სატვირთო მანქანაა. თებერვლის ბოლოს პოლონეთის პრემიერ-მინისტრმა, დონალდ ტუსკმა განაცხადა, რომ კიევთან საზღვრის დროებით დაკეტვისა და ორმხრივი ვაჭრობის შეწყვეტის შესახებ მოლაპარაკებებს აწარმოებენ. უკრაინის სავაჭრო წარმომადგენელმა, ტარას კაჩკამ ეს ინფორმაცია უარყო.