„ჯივიპიმ“ წყალმომარაგებაში ევროპული სტანდარტების დანერგვის პირველი ეტაპის შედეგები და მიმდინარე პროექტები წარადგინა.

„ჯივიპის“ მფლობელმა, ესპანურმა კომპანიამ Aqualia, 2023 წლის მეორე ნახევრიდან თბილისის, რუსთავისა და მცხეთის წყალმომარაგებაში ევროპული მიდგომებისა და სტანდარტების დანერგვა ახალი მულტიფუნქციური საოპერაციო ცენტრების გახსნით დაიწყო. კომპანიის პირველი ეტაპის მთავარი მიზნები ავარიებზე რეაგირების დროისა და ოპერატიულობის მაჩვენებლების გაუმჯობესება იყო.

„ჯივიპიში“ ევროპული სტანდარტებისა და მიდგომების დანერგვით Aqualia-მ შეძლო:

მულტიფუნქციური ბრიგადების ჩართულობით ოპერატიულობის გაზრდა, გარდამავალი ინციდენტების რაოდენობის 14-ჯერ, ხოლო წყალმომარაგების ქსელის დაზიანებებზე რეაგირების დროის 2-ჯერ შემცირება;

სადიაგნოსტიკო ჯგუფების მუშაობით წყალმომარაგების ქსელზე 900-მდე ფარული დაზიანების აღმოჩენა და ქსელზე პრევენციული აღდგენა, რამაც ჯამში წყალმომარაგების 400-მდე შეზღუდვა აარიდა თბილისისა და რუსთავის მოსახლეობას;

კრიტიკულ მდგომარეობაში მყოფი 90 კილომეტრამდე წყალსადენისა და წყალარინების ქსელის განახლება და ჯამში 96 მილიონ ლარზე მეტი ღირებულების 160 სარეაბილიტაციო პროექტის განხორციელება;

ქსელზე 1,173 ერთეული ჩამკეტ-მარეგულირებელი ურდულის დამონტაჟება და წყალმომარაგების შეზღუდვის არეალების საშუალოდ 8%-ით შემცირება;

„ჩვენ მიერ ჩატარებული სისტემური აუდიტის შემდეგ მყისიერად დავიწყეთ ქმედითი ნაბიჯების გადადგმა, რათა გაგვეუმჯობესებინა ის კრიტიკული მაჩვენებლები რაც საოპერაციო და ინფრასტრუქტურული მიმართულებებით გამოიკვეთა. შესაბამისად, შევიმუშავეთ 10 - წლიანი სამოქმედო გეგმა, რომლის მთავარი ამოცანაც ქართულ წყალმომარაგებაში ევროპული სტანდარტის დანერგვა იყო. უწყვეტი და ხარისხიანი წყალმომარაგება ჩვენ მომხმარებელს - ეს არის მთავარი მიზანი, რომელსაც Aqualia-ს თითოეული ნაბიჯი ემსახურება! ეს არის ერთგვარი ანგარიში ჩვენი მხრიდან, იმისთვის რომ საზოგადოებამ და ყველა დაინტერესებულმა მხარემ მუდმივად იცოდეს თბილისის, რუსთავისა და მცხეთის წყალმომარაგების გაუმჯობესებისთვის, რა პროცესი მიმდინარეობს.“ - აცხადებს „ჯივიპის“ გენერალური დირექტორი, ხოსე მიგელ სანტოსი.

სემეკ-ის თავმჯდომარის, დავით ნარმანიას განცხადებით, გასული წლის დეკემბერში სემეკ-მა უპრეცედენტო ინვესტიცია შეითანხმა „ჯივიპის“ ნაწილში, როგორც თბილისისთვის, ისე მცხეთისა და რუსთავისთვის. მისი თქმით, ეს ნიშნავს იმას, რომ ამ თანხის დახარჯვის შედეგად კიდევ უფრო მეტი პრობლემა მოგვარდება.

„კომისია, თავის მხრივ, ყურადღებით დააკვირდება კომპანიის საქმიანობას, რათა ის თანხები, რაც იქნა გათვალისწინებული და ტარიფში ასახული მაქსიმალურად ობიექტურად დაიხარჯოს სწორ ადგილას და ამ ყველაფერმა შედეგი მოგვცეს, მომხმარებლები უფრო უკეთ კმაყოფილები გვყავდნენ“, - განაცხადა დავით ნარმანიამ.

ამასთან, კომპანიის ცნობით, ამ ეტაპზე „ჯივიპის“ გუნდი აქტიურად იმუშავებს საოპერაციო მაჩვენებლების კიდევ უფრო გაუმჯობესებაზე, სამომხმარებლო სერვისების მოდერნიზაციასა და მნიშვნელოვანი ინფრასტრუქტურული პროექტების რეაბილიტაციაზე. კომპანია მომდევნო სამი წლის განმავლობაში, წყალმომარაგების სფეროში უპრეცედენტო - 363 მილიონ ლარიან ინვესტიციას განახორციელებს.